FLASH
Shkruar nga Pamfleti
Zhoze Murinjo është shfaqur si kandidati kryesor për të marrë drejtimin e Realit të Madridit, sipas raportimit të gazetarit të njohur David Ornstein. Presidenti i klubit, Florentino Perez, thuhet se e favorizon rikthimin e trajnerit portugez në “Santiago Bernabeu”, duke udhëhequr personalisht procesin e përzgjedhjes.
Megjithatë, burime pranë klubit bëjnë të ditur se mbështetja për Murinjon nuk është unanime brenda strukturave të Realit të Madridit. Pavarësisht kësaj, ndikimi i Perezit në vendimmarrje e pozicionon 63-vjeçarin si një nga kandidatët më të fortë për postin.
Një faktor që mund të lehtësojë transferimin është klauzola e largimit në kontratën aktuale të Murinjos me Benfikën, e cila raportohet të jetë rreth 3 milionë euro.
Reali është në kërkim të një trajneri të ri pas largimit të pritshëm të Alvaro Arbeloas në fund të sezonit. Edhe pse nuk ka ende një konfirmim zyrtar, largimi i tij konsiderohet tashmë i pashmangshëm.
Në listën e kandidatëve për stolin madrilen përmenden disa emra të njohur të futbollit europian, por tre prej tyre cilësohen si më realistët: Jurgen Klop, Mauricio Poçetino dhe Zhoze Murinjo.
Nga ana tjetër, edhe vetë Murinjo ka dhënë sinjale se është i hapur për një rikthim në Madrid gjatë verës. Raportohet se ai është i gatshëm të ndërpresë bashkëpunimin me Benfikën nëse arrihet një marrëveshje me Realin e Madridit.
Lini një Përgjigje