FLASH
Shkruar nga Pamfleti
Arbitrat vijojnë të jenë në qendër të debatit në Botërorin 2026, për shkak të disa vendimeve të kontestuara si nga gjyqtarët në fushë, ashtu edhe nga zyrtarët e sistemit VAR. Këtë herë, polemikat kanë shpërthyer përpara se të nisë ndeshja.
Shkak është bërë vendimi i FIFA-s për t'ia besuar çerekfinalen e parë të Kupës së Botës mes Francës dhe Marokut një trupe arbitrash tërësisht nga Argjentina. Facundo Tello do të jetë arbitri kryesor, ndërsa dy ndihmësit e tij, arbitri i katërt dhe arbitri VAR do të jenë gjithashtu argjentinas.
Kjo është hera e parë gjatë këtij Botërori që pothuajse e gjithë trupa arbitrare për një ndeshje përbëhet nga përfaqësues të të njëjtit shtet. Në të gjitha sfidat e zhvilluara deri tani, FIFA kishte zgjedhur që vetëm arbitri kryesor dhe dy asistentët të ishin nga e njëjta kombësi, ndërsa arbitri i katërt dhe ai i VAR-it vinin nga vende të tjera.
Vendimi i fundit i qeverisë botërore të futbollit nuk është pritur mirë në Francë, sidomos për faktin se arbitrat janë nga Argjentina, një prej rivalëve të mëdhenj dhe një kundërshtar i mundshëm i "Gjelave" në rrugën drejt fitimit të Kupës së Botës.
Sipas "RMC Sport", ky vendim është një tjetër dëshmi e mënyrës së papërshtatshme të veprimit të FIFA-s. Edhe media të tjera franceze kanë reaguar në të njëjtën linjë, ndërsa në kampin e kombëtares franceze lajmi është pritur me më shumë qetësi, pavarësisht përvojës jo të mirë me arbitrimin në ndeshjen e 1/16-ve të finales ndaj Paraguajit.
Lini një Përgjigje