FLASH
Shkruar nga Pamfleti
Federata Boliviane e Futbollit ka bërë të ditur se do t’i drejtohet me letër zyrtare FIFA-s për të kërkuar forcimin e masave të sigurisë gjatë ndeshjeve “play-off” për Botërorin 2026, të planifikuara të zhvillohen në mars në Meksikë.
Sipas presidentit të Federatës Boliviane, Fernando Costa, delegacioni i Bolivisë po merr të gjitha masat paraprake, ndërsa pret që edhe FIFA të ndërhyjë me vendime konkrete.
“Do të kërkojmë që të rriten të gjitha masat e sigurisë. Si delegacion po marrim çdo masë paraprake,” deklaroi Costa. Ai shtoi se pritet që FIFA të shqyrtojë situatën dhe, nëse është e nevojshme, të marrë vendime të tjera, përfshirë edhe mundësinë e ndryshimit të vendndodhjes së ndeshjeve.
Kërkesa e Federatës Boliviane vjen pas valës së dhunës që shpërtheu në Meksikë pas raportimeve për vdekjen e Nemesio Oseguera Cervantes, i njohur si “El Mencho”, i konsideruar si një nga figurat kryesore të narkotrafikut në vend.
Autoritetet meksikane nuk janë cituar në lidhje me ndikimin e këtyre zhvillimeve në organizimin e aktiviteteve sportive ndërkombëtare, ndërsa federatat pjesëmarrëse po ndjekin nga afër situatën.
Turneu kualifikues, i cili do të ndajë dy bileta për Botërorin 2026, do të zhvillohet në Guadalajara dhe Monterrey. Në këtë fazë marrin pjesë Bolivia, Xhamajka, Iraku, Kongo, Kaledonia e Re dhe Surinami.
Bolivia do të përballet me Surinamin më 26 mars në Monterrey.
Shqetësime për sigurinë ka shprehur edhe Federata Portugeze e Futbollit. Në një njoftim zyrtar, ajo bëri të ditur se po monitoron me kujdes situatën përpara miqësores së 28 marsit kundër Meksikës, e planifikuar të zhvillohet në Stadiumin “Azteca” në Mexico City.
Federata Portugeze theksoi se prioritet absolut mbetet siguria e lojtarëve, stafit dhe tifozëve. Në këtë ndeshje pritet të jetë i pranishëm edhe Cristiano Ronaldo.
Deri më tani, FIFA nuk ka bërë një reagim publik lidhur me kërkesën e Bolivisë apo me mundësinë e ndryshimit të planit organizativ.
Lini një Përgjigje