FLASH
Shkruar nga Pamfleti
Leo Mesi është shndërruar në një nga figurat më të përmendura në fushatën zgjedhore për presidencën e Barcelonës, edhe pse vetë nuk ka kërkuar të jetë pjesë e këtij procesi. Që në fillim, argjentinasi ka qenë i qartë se nuk dëshiron të përfshihet në garën për drejtimin e klubit, pavarësisht përpjekjeve të disa parakandidatëve për ta lidhur emrin e tij me projektet e tyre.
Sipas burimeve pranë lojtarit, të cituara nga e përditshmja “MARCA”, Mesi nuk ka zhvilluar asnjë bisedë me asnjë kandidat dhe nuk ka ndërmend ta bëjë këtë gjatë procesit zgjedhor. I njëjti qëndrim vlen si për kontakte të drejtpërdrejta, ashtu edhe për ato të tërthorta, ndonëse disa zhvillime nuk i kanë pëlqyer.
Një nga episodet që ka tërhequr vëmendje ishte vendosja e një pankarte në një ndërtesë në Barcelonë nga Mark Ciria, ku lexohej mesazhi: “Dëshirë për të të parë përsëri”. Edhe pse në pankartë nuk përmendet emri i Messit dhe nuk shfaqet qartë fytyra e tij, mesazhi u interpretua gjerësisht si një thirrje për rikthimin e argjentinasit në klub.
Sipas të njëjtave burime, pankarta është vendosur pa dijeninë e lojtarit.
Mark Ciria ka tentuar gjithashtu të kontaktojë me Mesin, duke pasur si një nga shtyllat kryesore të fushatës së tij rikthimin e 8 herë fituesit të “Topit të Artë”. Megjithatë, Mesi nuk ka pranuar të përfshihet.
Një situatë e ngjashme ka ndodhur edhe me Víktor Font. Përmes Gabriel Masfurroll, parakandidati ka tentuar të lidhet me rrethin e ngushtë të lojtarit, por pa sukses. Vetë Font ka deklaruar se kontaktet e përmendura kanë ndodhur shumë kohë më parë dhe asnjëherë drejtpërdrejt me Mesin.
Në këtë kontekst, kanë spikatur edhe deklaratat e fundit të Joan Laportës, i cili ka folur për marrëdhënien e tij me Mesin, për largimin e argjentinasit nga Barcelona dhe për mundësinë e një ceremonie lamtumire. Sipas Laportës, organizimi i një ceremonie të tillë është në dorën e vetë lojtarit.
Deri më tani është bërë publik vetëm versioni i Laportës mbi këtë çështje, ndërsa mbetet për t’u parë nëse Mesi do të reagojë apo do të japë një qëndrim publik në vijim.
Lini një Përgjigje