FLASH
Shkruar nga Pamfleti
Marash Kumbulla, mbrojtësi i kombëtares shqiptare, mund të jetë gati për një tjetër aventurë në “La Liga”. Sipas mediave italiane, qendërmbrojtësi i Romës është rikthyer fuqishëm në listën e dëshirave të Espanjolit, klub ku ai ka luajtur më parë si i huazuar dhe ku la përshtypje pozitive.
Aktualisht, 24-vjeçari është kthyer te Roma pas përfundimit të huazimit tek Espanjoli, por e ardhmja e tij në kryeqytetin italian nuk është e sigurt. Drejtuesit verdhekuq po shqyrtojnë mundësinë për ta lënë sërish në huazim, me katalanasit që shihen si një nga kandidatët kryesorë për të siguruar shërbimet e tij. Drejtori sportiv i Espanjolit, Fran Garagarza, ka pranuar se skuadra po punon intensivisht për të përforcuar repartin e mbrojtjes në këtë merkato vere.
Deri tani, Espanjoli ka afruar Miguel Rubio nga Granada, Hugo Pérez nga Vijareal B dhe Hoze Salinas nga Elçe, duke ndërtuar një bazë solide në prapavijë. Megjithatë, Kumbulla shihet si një lojtar me eksperiencë ndërkombëtare dhe cilësi të larta, që mund të bëjë diferencën në sezonin e ri 2025-2026. “Jemi të pozicionuar për disa lëvizje, por nuk është gjithmonë në dorën tonë. Ka konkurrencë dhe situata ekonomike nuk është e lehtë. Megjithatë, po punojmë që ta bëjmë siç duhet”, u shpreh Garagarza, duke lënë të kuptohet se negociatat me Romën janë të hapura.
Nëse marrëveshja konkretizohet, Kumbulla do të ishte afrimi i katërt për mbrojtjen e Espanjolit këtë verë. Përveç angazhimit në merkato, skuadra e Manolo Gonzalez po përgatitet për startin e “La Ligës”, ku do të debutojë ndaj Atletikos së Madridit në stadiumin “RCDE”.
Kumbulla ka qenë një titullar në takimin e fundit për kombëtaren shqiptare dhe një rikthim në “La Liga” mund t’i japë atij minutat dhe stabilitetin që i duhen para ndeshjeve të rëndësishme të kuqezinjve. Një transferim tek Espanjoli do t’i lejonte gjithashtu të rikthehej në një kampionat ku ai ka treguar se mund të përshtatet shpejt, duke ofruar siguri dhe forcë në mbrojtje.
Lini një Përgjigje