FLASH
Shkruar nga Pamfleti
Ashraf Hakimi pritet të dalë para Gjykatës Penale të Departamentit Hauts-de-Seine në Francë, pas kërkesës së Prokurorisë së Nanterre për ta çuar çështjen në gjykim, lidhur me akuza për përdhunim që datojnë nga shkurti i vitit 2023.
Sipas pretendimeve të një gruaje të re, ajo është ngacmuar dhe më pas përdhunuar në banesën e lojtarit, të cilin e kishte njohur përmes rrjetit social Instagram. Aktakuza u bë publike nga avokatja e futbollistit, Fanny Colin, e cila konfirmoi se prokurorja ka kërkuar dërgimin e çështjes për shqyrtim gjyqësor.
Lojtari reagoi përmes llogarisë së tij në platformën X, duke kundërshtuar kategorikisht akuzat.
“Sot, një akuzë për përdhunim është e mjaftueshme për të justifikuar një gjyq, edhe nëse e kundërshtoj atë dhe gjithçka vërteton se është e rreme. Është e padrejtë si për viktimat e pafajshme ashtu edhe për ato të sinqerta. E pres me qetësi këtë gjyq, i cili do të lejojë që e vërteta të dalë publikisht”, ka shkruar ai.
Aujourd’hui une accusation de viol suffit à justifier un procès alors même que je la conteste et que tout démontre qu’elle est fausse. C’est aussi injuste pour les innocents que pour les victimes sincères. J’attends avec calme ce procès qui permettra que la vérité éclate…
— Achraf Hakimi (@AchrafHakimi) February 24, 2026
Edhe më herët, në shtator të vitit të kaluar, gjatë një transmetimi në Canal+, futbollisti kishte mohuar akuzat, duke deklaruar: “E di që nuk bëra asgjë dhe nuk do ta bëja kurrë.”
Sipas mbrojtjes, hetimi është penguar nga pala paditëse. Avokatja Colin ka deklaruar se gruaja në fjalë ka refuzuar t’i nënshtrohet testeve mjekësore dhe analizave të ADN-së, si dhe nuk ka pranuar të japë qasje në telefonin e saj. Po ashtu, sipas saj, ajo ka refuzuar të zbulojë identitetin e një dëshmitari të konsideruar kyç për çështjen.
Mbrojtja thekson gjithashtu se dy vlerësime psikologjike të kryera më vonë kanë evidentuar, sipas tyre, mungesë qartësie në përshkrimin e fakteve dhe mungesë simptomash post-traumatike.
“Ne e presim këtë gjyq të vendosur dhe luftarak, në mënyrë që drejtësia të bëhet”, është shprehur avokatja e lojtarit.
Nga ana tjetër, pala civile, e përfaqësuar nga avokatja Rachel-Flore Pardo, këmbëngul se hetimi ka mbledhur prova të mjaftueshme për ta kualifikuar rastin si sulm seksual dhe për ta çuar çështjen përpara drejtësisë.
Gjykimi pritet të hedhë dritë mbi rrethanat e ngjarjes dhe të përcaktojë përgjegjësinë penale nëse provohen akuzat.
Lini një Përgjigje