FLASH
Shkruar nga Pamfleti
Skënderbeu ka arritur një fitore të pastër 0-2 në miqësoren e zhvilluar në Pogradec, duke treguar formë të mirë në prag të sezonit të ri.
Dhjetë minutat e para ishin të qeta për të dyja skuadrat, ku Skënderbeu u përpoq disi më shumë, por pa rrezikuar portën vendase, ndërkohë që liqenorët thuajse zgjodhën të luanin më shumë në prapavijë. Duhet të vinte minuta e 11 që Skënderbeu, me një zbritje të shpejtë në krahun e majtë, të çonte topin në hyrje të zonës së Pogradecit. Janaqi goditi fuqishëm dhe përshëndeti rrjetën, duke kaluar Skënderbeun në avantazh 0-1.
Pati festë te bardhekuqtë për golin e avantazhit, ndërkohë që tre minuta më pas, ishin pogradecarët që krijuan rastin e parë. Sodiq Kazim, nga e djathta, goditi drejt portës, por Marko Alia priti pa vështirësi.
Në minutën e 22 erdhi një tjetër rast për Pogradecin. Pas një krosimi në zonë, Sodiq goditi me kokë, por topi kaloi ngjitur me traversën e portës së Alias, duke shpëtuar kështu Skënderbeun.
Në minutën e 35, Pogradeci humbi rastin ideal për të barazuar. Kazim i shpëtoi mbrojtjes, doli përballë portierit Alia, goditi, por “gardiani” i Skënderbeut bëri një pritje vendimtare, duke shmangur një gol të sigurt.
Pjesa e parë u mbyll me avantazhin minimal të Skënderbeut. Pjesa e dytë nis me ndërrime nga të dyja ekipet. Loja mbeti e qetë dhe e vakët deri në minutën e 60, me mungesë rastesh në të dyja portat. Në minutën e 61, Tajo për Skënderbeun pati mundësinë të dyfishonte, por pas një prekjeje të gjatë të topit në zonë, portieri Staniç shpëtoi portën vendase.
Në minutën e 73, Skënderbeu shënoi golin e dytë. Rodriges, në përpjekje për t’ia kthyer topin portierit Staniç, gaboi me kokë dhe e dërgoi atë në rrjetë për 0-2. Dy minuta më vonë, Nasr në zonën e 5-metërshit gjuajti diagonalisht, por portieri pogradecar shpëtoi sërish duke devijuar në goditje këndi. Deri në fundin e takimit nuk pati raste të tjera, përveç disa gabimeve nga të dyja skuadrat, dhe përfundimisht Skënderbeu fitoi pastër 0-2 në transfertën e Pogradecit, duke bindur me lojë dhe rezultat.
Lini një Përgjigje