FLASH
Shkruar nga Pamfleti
Tifozët që synojnë të ndjekin nga afër finalen e Botërorit të kësaj vere do të përballen me çmime rekord për biletat, të cilat arrijnë deri në 11, 000 dollarë. Rritja e fundit e çmimeve u bë publike nga FIFA këtë të mërkurë, vetëm dy ditë pasi u kompletua lista e skuadrave pjesëmarrëse.
Çmimi maksimal i biletës për finalen shënon një rritje të konsiderueshme krahasuar me Botërorin e vitit 2022, ku bileta më e shtrenjtë kushtonte rreth 1,600 dollarë. Edhe krahasuar me fazat e mëparshme të shitjeve për këtë edicion, rritja është e dukshme: më herët, çmimi maksimal ishte 8,680 dollarë.
Rritje janë regjistruar edhe në kategoritë më të ulëta të biletave për finalen.
Kategoria 2 ka arritur në 7,380 dollarë, nga 5,575 dollarë që ishte në dhjetor.
Kategoria 3 kushton aktualisht 5,785 dollarë, nga 4,185 dollarë më parë.
FIFA ka aplikuar modelin e çmimeve dinamike, një sistem sipas të cilit çmimet ndryshojnë në varësi të kërkesës në treg. Ky model është kritikuar shpesh, pasi mund të çojë në rritje të papritura dhe të larta të çmimeve për tifozët.
Nga ana tjetër, organizata thekson se të ardhurat e gjeneruara nga turneu do të përdoren për zhvillimin e futbollit bazë në nivel global.
Biletat për finalen dhe për 17 ndeshjet e fazës së grupeve dolën në shitje këtë të mërkurë. FIFA ka bërë të ditur se pritet të ketë edhe faza të tjera shitjeje me bileta shtesë deri në përfundim të turneut.
Botërori i ardhshëm do të zhvillohet në Shtetet e Bashkuara, Kanada dhe Meksikë. Turneu nis më 11 qershor dhe përfundon më 19 korrik, me finalen që do të luhet në New Jersey.
Lini një Përgjigje