Dominim i Leklerkut në Australi, piloti i Ferrarit dy “bingo” nga 3 gara, Verstapen dhe Sainz jashtë pistës - Sport
Sport10 Prill 2022, 20:12

Dominim i Leklerkut në Australi, piloti i Ferrarit dy “bingo” nga 3 gara, Verstapen dhe Sainz jashtë pistës

Shkruar nga Pamfleti
Dominim i Leklerkut në Australi, piloti i Ferrarit dy “bingo”

Dominim i Leklerkut në Australi, piloti i Ferrarit dy “bingo” nga 3 gara, Verstapen dhe Sainz jashtë pistës

Çarls Leklerck e nisi dhe e përfundoi i pari Çmimin e Madh të Australisë. Piloti i Ferrarit siguroi fitoren e dytë në garën e tretë sezonale, teksa kampioni në fuqi, Maks Verstapen, dhe Karlos Sainz, piloti tjetër i Ferrarit, përfunduan jashtë piste.

Vetëm vendi i katërt për Ljuis Hamilton. Leklerk siguroi “pole position” një ditë më parë. 24-vjeçari nga Montekarlo kreu një nisje perfekte, dominoi gjithë garën, nuk gaboi asgjë, dhe kryeson kampionatin me 71 pikë.

Verstapen tentoi ta sulmonte pas futjes së “Safety Car”, pas incidentit të Sebastian Vetel, por Leklerk rezistoi dhe nuk e humbi vendin e parë në pistën e Melburnit. Holandezi i RedBullit përfundoi jashtë për shkak të problemeve në motor.

Kjo ishte tërheqja e dytë në tre garat e këtij sezoni për pilotin tulipan. Në pod përkrah Leklerk u ngjitën Serxhio Perez (Redbull) dhe Xhorxh Rasëll (Mercedes), me këtë të fundit që u rendit një pozicion mbi Hamilton.

Renditja e përgjithshme kryesohet nga Leklerk me 71 pikë, më pas britaniku Rasëll (37) dhe spanjolli Sainz i Ferrarit (33 pikë). 28 pikë dhe vendi i pestë për Hamilton, ndërsa Verstapen numëron vetëm 25 pikë.

Fituesi i Çmimit të Madh të Australisë, u shfaq i lumtur pas suksesit të dytë sezonal. “Çfarë makine fantastike, kjo ishte fitorja e parë në Formula 1 me Ferrarin ku kontrolluam avantazhin gjatë gjithë garës.

Sigurisht që jemi vetëm në garën e tretë, por sinqerisht ne kemi një makinë shumë të fortë dhe shumë të besueshme. Shpresojmë të vazhdojmë kështu përpara. Nëse e bëjmë, padyshim që do të kemi shansin për të fituar kampionatin.

Dhe kjo na bën të buzëqeshim, pas viteve të fundit që kanë qenë të vështira për mua dhepër ekipin”, deklaroi Leklerk, i cili beson te fitimi i titullit botëror, me “kokëkuqen” që suksesin e fundit e ka regjistruar në vitin 2007 me Kimmi Raikkonen. /Supersport

Sport Çarls Leklerk Formula 1 piloti i Ferrarit