FLASH
Shkruar nga Pamfleti
Në mes të akuzave dhe dyshimeve për manipulim të votës së emigrantëve shqiptarë, DHL ka thyer më në fund heshtjen. Kompania postare ka reaguar zyrtarisht për mënyrën se si menaxhoi transportin e fletëve të votimit për zgjedhjet e 11 majit, duke mohuar çdo përfshirje në lojëra politike apo financiare. Reagimi saj është dhe një përgjigje ndaj KQZ, e cila e akuzoi se theu kontratën me pajtimin e kompanive nënkontraktore.
Në një deklaratë DHL Albania ka “lartë duart”, duke mohuar çdo parregullsi. “DHL Albania, si pjesë e rrjetit global DHL me prani në më shumë se 220 vende, realizoi këtë projekt kompleks në një afat rekord, duke garantuar procesimin dhe dorëzimin e materialeve zgjedhore me saktësi, siguri dhe transparencë të plotë”, thuhet në njoftim.
Sipas kompanisë, për këtë operacion u angazhua një avion i dedikuar që fluturoi çdo ditë deri në afatin e fundit të vendosur nga KQZ-ja, ndërsa procesi u mbikëqyr në kohë reale nga Qendra Evropiane e Kontrollit të Cilësisë me seli në Gjermani.
Përsa i përket pretendimeve të ngritura nga opozita për mosrespektim të kontratës dhe dyshime për ndërhyrje në disa shtete, DHL i cilëson këto si të pavërteta. Kompania pranon se kishte sfida, por thekson se i përballoi me infrastrukturë moderne dhe profesionalizëm.
“Sfidat e mëdha –nga kufizimet kohore deri te kompleksiteti gjeografik dhe problematikave në cilësinë e të dhënave në dispozicion – u tejkaluan me profesionalizëm, duke përdorur teknologjinë dhe infrastrukturën e përparuar të DHL. Integriteti i shërbimit të DHL është i padiskutueshëm dhe i pakompromentueshëm ndaj çdo interesi, financiar apo politik”, thuhet më tej.
Por pavarësisht pretendimeve të kompanisë, të gjithë e dimë se shumë qytetarë nuk e morën zarfin në kohë. Shumë shkuan në pikat postare, ndërsa të tjerëve postieri vetëm sa ja u dha dhe nuk shkoi ta merrte pas.
Lini një Përgjigje