FLASH
Shkruar nga Pamfleti
Vendimi i rektorit Artan Hoxha për pezullimin e Dorina Hoxhës u rrëzua nga gjykata; rikthimi në detyrë hyn në fuqi menjëherë, pavarësisht ankimit në Apel
Gjykata Administrative e Tiranës i ka dhënë të drejtë dekanes së Fakultetit të Drejtësisë, prof. dr. Dorina Hoxha, duke shfuqizuar aktin e rektorit të Universitetit të Tiranës, Artan Hoxha, për pezullimin e saj nga detyra.
Me vendimin e saj, gjykata urdhëroi rikthimin e menjëhershëm të Dorina Hoxhës në detyrën e dekanes, duke përcaktuar se vendimi është i ekzekutueshëm menjëherë. Kjo do të thotë se ajo duhet të rikthehet në funksion që ditën e sotme, edhe nëse pala humbëse vendos ta ankimojë çështjen në Gjykatën Administrative të Apelit.
Çështja nisi më 20 maj 2026, kur rektori i Universitetit të Tiranës, Artan Hoxha, firmosi urdhrin për pezullimin e dekanes së Fakultetit të Drejtësisë. Në aktin administrativ argumentohej se masa merrej pasi Dorina Hoxha kishte shprehur interes për të kandiduar si anëtare e Këshillit të Lartë Gjyqësor (KLGJ), me qëllim, sipas vendimit, garantimin e paanshmërisë institucionale dhe shmangien e konfliktit të interesit gjatë procedurës së përzgjedhjes së anëtarëve të KLGJ-së dhe Këshillit të Lartë të Prokurorisë (KLP).
Në të njëjtin vendim, rektori caktoi profesor Skënder Kaçupin për të ushtruar përkohësisht funksionet e dekanit të Fakultetit të Drejtësisë.
Pezullimi shkaktoi debat në mjedisin akademik dhe juridik, ku u ngritën pikëpyetje mbi bazën ligjore të ndërhyrjes së rektorit ndaj një dekani të zgjedhur me votë nga komuniteti universitar. Në diskutimet publike u theksua se marrëdhënia ndërmjet rektorit dhe dekanit është e rregulluar nga ligji dhe parimi i autonomisë universitare, ndërsa kufijtë e kompetencave administrative mbeten objekt interpretimi ligjor.
Vendimi i Gjykatës Administrative për shfuqizimin e aktit të pezullimit përbën zhvillimin më të rëndësishëm në këtë çështje dhe rikthen dekanen në ushtrimin e mandatit të saj deri në një vendimmarrje tjetër përfundimtare, nëse procedurat gjyqësore vijojnë në shkallët më të larta.
Lini një Përgjigje