Shkruar nga Pamfleti
Endrit Yzeiraj, ekspert ekonomie është emri më i ri që është bërë pjesë e kabinetit të qeverisë së kryeministrit Rama. Ai ka marrë postin e zv.ministrit të Financave, duke zëvendësuar kështu Besart Kadian, i cili është larguar për në dikasterin e Ministrisë së Punëve të Jashtme.
Yzeiraj rezulton të jetë pjesë drejtuese e Fondit shqiptaro-amerikan, pa asnjë amerikan dhe përfitues tenderësh, koncesionesh, ndërtim resortesh, kulla e deri në rindërtim pallatesh post-tërmet.
Shefat e këtij institucioni që kanë përfituar miliarda lekë nga shteti janë Martin Mata dhe Aleksandër Sarapuli, të lidhur ngushtë me kryeministrin dhe znj.Linda Rama. Kujtojmë se Sarapuli është edhe ndërtuesi i sarajeve të Edi dhe Linda Ramës, por gjithashtu edhe ortak me Erion Veliajn në fondin financiar jo bankar "Crimson Finance Found Albania shpk".
Por të ndalemi pak te Endrit Yzeiraj i fondacionit shqiptaro-amerikan. Ai ka qenë mjaft kritik në lidhje me amnistinë fiskale ku e ka kundërshtuar kryeministrin Rama si dhe kundër shembjes së Teatrit Kombëtar.
Në një analizë të tij, Yzeiraj parashtroi disa prej problematikave që kishte vënë në projektin e amnistisë fiskale, që sipas tij, mund të sjellë mjaft pasoja në ekonomi. Disa muaj më vonë Rama e emëron zv.ministër Financash. Një histori e ngjashme me paraardhësin e tij Besart Kadia, ku nga kampi blu i Lulzim Bashës dhe kritik i ministres së asaj kohe, Anila Denaj, u bë vartës i saj si zv.ministër i Rilindjes./Pamfleti
