FLASH
Shkruar nga Pamfleti
Ish-ministri i Brendshëm, Saimir Tahiri është liruar ditën e sotme me kusht nga burgu.
Gjykata e Elbasanit vendosi që Tahiri ta kryejë pjesën e mbetur të dënimit në shtëpi. Vendimi u mor sot nga gjyqtarja e Gjykatës së Elbasanit Matilda Fetahu.
Mësohet se avokatët e tij kanë paraqitur në gjykatë një ekspertizë mjekësose, në të cilën thuhet se ai nuk mund të qëndrojë në burg. Ish-ministri ka qëndruar rreth 16 muaj burg qeli. Fillimisht ka qenë në qeli në Peqin dhe më pas në burgun e Lushnjës. Tahirit i kishin mbetur gati 1 vit e disa muaj nga dënimi.
Gjatë seancave të mëparshme gjyqësore, Tahiri kërkoi ulje të dënimit me 1 vit e 6 muaj burg pasi pretendoi se gjatë periudhës kur ai ka kryer shërbimin e provës ka shlyer 1.6 vjet nga dënimi që shqiptoi Gjykata e Apelit.
Saimir Tahiri u dënua me 3 vite e 4 muaj burg për veprën penale të “shpërdorimit të detyrës”. Ai u vu nën shënjestrën e organeve të drejtësisë në tetor të vitit 2017, pasi autoritetet italiane goditën një grup të strukturuar kriminal në trafikun e marijuanës, që drejtohej nga vëllezërit Habilaj.
“Gjykata ka konkluduar se i pandehuri Saimir Tahiri provohet tej çdo dyshimi të arsyeshëm se ka përfituar nga Moisi Habilaj dhe Artan Habilaj shërbime dhe përfitime të padrejta dhe se njëkohësisht shpërdorimi i detyrës ka dëmtuar interesat e ligjshëm të shtetit,” deklaroi gjyqtari Engert Pëllumbi.
Në shtator 2019, Tahiri u shpall i pafajshëm për akuzat e trafikut të narkotikëve dhe grupit të strukturuar kriminal, por u dënua nga Gjykata e Krimeve të Rënda me 5 vjet burg për shpërdorim detyre, dënim i cili u konvertua me 3.4 vjet për shkak të gjykimit të shkurtuar.
Vendimi u kontestua në Apel dhe në Gjykatën e Lartë dhe pas rikthimit për shqyrtim prodhoi sërish të njëjtin rezultat.
Lini një Përgjigje