Aktualitet23 Prill 2024, 07:32

Skandali i vjedhjes së TIMS, Dervishi bën deklaratën e fortë: Gati sa nuk janë nxjerrë pistoletat për t’u vrarë!

Shkruar nga Pamfleti
Skandali i vjedhjes së TIMS, Dervishi bën deklaratën e
Ferdinand Dervishi

Një nga gazetarët e parë që ka denoncuar vjedhjen e të dhënave në sistemin TIMS ka qenë Ferdinand Dervishi.

Dërvishi zbuloi një detaj të rëndë në "Opinion", ku tha se gati sa nuk janë nxjerrë pistoletat mes atyre që donin të mbronin të dhënat e shqiptarëve dhe atyre që tentonin t’i merrnin ato.

Dervishi u shpreh se për të realizuar këtë skenar janë marrë njerëz të jashtëm pasi vetë punonjësit e policisë kanë refuzuar që të bashkëpunonin.

“Kam bërë një postim në Facebook në datën 4 Gusht 2023. Ngjarja ka ndodhur në datat 2 dhe 3 Gusht. I vënë sigurisht me ato lidhjet në polici më thanë që ka ndodhur një gjë shumë e madhe. Ka filluar diku në orët e para të pasdites të datës 2 dhe ka vazhduar deri në orën 10 të datës tjetër që bëhen 20 orë. Pati reagim zyrtar që thanë që nuk është e vërtetë. E vërteta ishte aty. Për 20 orë në Policinë e Shtetit është bërë një ndërhyrje në sistemin TIMS, aty gati sa nuk kanë nxjerrë pistoleta për t’u vrarë me njëri-tjetrin njerëzit që donin të mbronin pasurinë e shqiptarëve dhe të dhënat e shqiptarëve dhe njerëzit që po tentonin për t’i marrë ata. Janë marrë njerëz nga jashtë sepse vetë punonjësit e policisë refuzuan të bashkëpunonin. Janë marrë njerëz civilë nga jashtë dhe një nga këta që është marrë është me të shkuar penale shumë të rëndë në Itali dhe është realizuar ajo që tani është nën hetim. Ne nuk dimë konkretisht çfarë është vjedhur, por dimë që ka pasur një tentativë sipas dokumenteve që kanë dalë tashmë për të kopjuar me përzgjedhje në sistemin TIMS, që rrëzon idenë e backup-it…”, u shpreh Dervishi.

 

ferdinand dervishi skandali i vjedhjes së tims