FLASH
Shkruar nga Pamfleti
Raketa, kundërpërgjigje dhe viktima civile, rajoni përballet me krizë të thellë...
Përplasja ushtarake mes SHBA-së, Izraelit dhe Iranit po sjell një bilanc gjithnjë e më të rëndë viktimash në disa vende të rajonit, ndërsa operacionet ajrore, raketore dhe detare vazhdojnë për të tretën ditë radhazi.
Pentagoni konfirmoi se tre ushtarakë amerikanë janë vrarë gjatë operacioneve kundër objektivave iraniane, ndërsa pesë të tjerë janë plagosur rëndë. Disa efektivë të tjerë kanë pësuar lëndime të lehta nga copëza predhash dhe tronditje, por janë rikthyer në detyrë. Këto janë viktimat e para të konfirmuara amerikane që nga nisja e fushatës së fundit ushtarake.
Në Izrael, autoritetet raportojnë nëntë persona të vrarë nga goditjet iraniane, përfshirë viktima në qytetin Beit Shemesh. Të paktën 40 persona të tjerë janë plagosur, ndërsa sistemet e mbrojtjes ajrore kanë interceptuar valë të njëpasnjëshme raketash dhe dronësh.
Në Emiratet e Bashkuara Arabe, autoritetet konfirmuan tre viktima dhe 58 të plagosur si pasojë e sulmeve iraniane dhe mbetjeve të predhave të interceptuara. Aeroportet në Dubai dhe Abu Dhabi pësuan dëmtime, duke shkaktuar pezullim të përkohshëm të fluturimeve dhe bllokim të mijëra udhëtarëve.
Në Katar, shpërthime u raportuan pranë zonave ku ndodhen baza ushtarake amerikane. Autoritetet lokale kanë konfirmuar dëme materiale, ndërsa bilanci i plotë i viktimave mbetet i paqartë.
Sa i përket Iranit, media shtetërore raportoi se numri i viktimave nga sulmet amerikano-izraelite është shumë më i lartë. Sipas autoriteteve iraniane, dhjetëra zyrtarë ushtarakë janë vrarë, ndërsa nga një goditje ndaj një shkolle në qytetin Minab raportohen afro 150 viktima, përfshirë mbi 100 fëmijë. Këto shifra nuk janë verifikuar në mënyrë të pavarur.
Ndërkohë, presidenti amerikan Donald Trump deklaroi se gjatë operacionit të përbashkët janë vrarë 48 udhëheqës të Republikës Islamike. “48 udhëheqës u vranë me një goditje dhe gjërat po lëvizin shumë shpejt”, tha ai në një intervistë për Fox Neës, duke e cilësuar operacionin si një sukses të madh ushtarak.
Bilanci i përgjithshëm mbetet në rritje, me viktima të konfirmuara në disa vende të rajonit dhe me rrezik të lartë për përhapje të mëtejshme të konfliktit në të gjithë Lindjen e Mesme. /Pamfleti
Lini një Përgjigje