FLASH
Shkruar nga Pamfleti
Komisioneri i BE-së për Zgjerimin, Oliver Varhelyi ka deklaruar se së shpejti pritet që Komisioni Evropian të propozojë që BE-ja t'u japë më shumë para vendeve që duan të anëtarësohen dhe t'u ofrojë atyre akses në tregun e vetëm për të përshpejtuar përgatitjet e tyre për anëtarësim.
Sipas tij aktualisht statusin e vendit kandidat e kanë tetë vende si Shqipëria, Bosnja dhe Hercegovina, Moldavia, Mali i Zi, Maqedonia e Veriut, Serbia, Turqia dhe Ukraina ndërsa dy, Gjeorgjia dhe Kosova, janë vende kandidate potenciale.
"Brenda disa javësh do të na shihni duke paraqitur një mënyrë të re të të menduarit për zgjerimin dhe një paketë që tani do të përfshijë 10 vende kandidate ose vende me perspektivë evropiane," ka thënë Varhelyi në një konferencë shtypi.
Varhelyi ka thënë se BE do të kërkojë të ndihmojë kandidatët të përgatiten më shpejt për anëtarësimin në BE përmes një plani rritjeje për Ballkanin Perëndimor për të reduktuar "hendekun ekonomik dhe social" midis këtyre vendeve dhe pjesës tjetër të BE-së përpara pranimit.
Sipas skemës, vendet gradualisht do të kenë akses në tregun e vetëm të BE-së prej 450 milionë konsumatorësh, ku mallrat, shërbimet, puna dhe kapitali mund të lëvizin lirshëm, edhe para se të bëhen anëtarë të plotë të BE-së.
Ai tha se propozimi i Komisionit do të kërkonte gjithashtu më shumë para BE-së për kandidatët për të ndihmuar në përshpejtimin e reformave të nevojshme për t'u bashkuar me bllokun tashmë 27-vendesh.
Nga ana tjetër Presidenti i Këshillit Evropian, Charles Michel, ka bërë thirrje që BE të jetë gati për të pranuar anëtarë të rinj dhe që kandidatët të jenë gati për të përmbushur kriteret e hyrjes, deri në vitin 2030.
Lini një Përgjigje