FLASH
Shkruar nga Pamfleti
UNICEF deklaroi se gati 200 fëmijë janë vrarë që nga fillimi i përshkallëzimit ushtarak në Lindjen e Mesme, duke paralajmëruar për pasojat e rënda që konflikti po ka mbi civilët, veçanërisht mbi të miturit.
“Nuk janë fëmijët ata që i nisin luftërat, por ata paguajnë një çmim të papranueshëm të lartë. Përshkallëzimi ushtarak në Lindjen e Mesme tashmë ka pasur një ndikim shkatërrues mbi fëmijët”, deklaroi UNICEF.
Sipas të dhënave të raportuara nga organizata dhe autoritetet lokale, qindra civilë janë vrarë në rajon që nga fillimi i luftimeve, ndërsa viktimat përfshijnë edhe dhjetëra fëmijë. Në disa raste janë raportuar edhe sulme pranë shkollave dhe zonave të banuara.
Konflikti i ri në Lindjen e Mesme nisi më 28 shkurt 2026, kur Shtetet e Bashkuara dhe Izraeli ndërmorën një seri sulmesh ajrore kundër objektivave ushtarake dhe të sigurisë në Iran.
Sulmet shënuan një përshkallëzim të madh të tensioneve mes palëve dhe çuan në një valë kundërsulmesh nga Irani, i cili lëshoi raketa dhe dronë drejt Izraelit dhe drejt bazave amerikane në rajon.
Luftimet janë zgjeruar gradualisht edhe në vende të tjera të rajonit, përfshirë Libanin, ku përplasjet mes Izraelit dhe Hezbollahut kanë shkaktuar viktima dhe zhvendosje të mijëra civilëve.
Ndërkohë, organizatat ndërkombëtare dhe Kombet e Bashkuara kanë bërë thirrje për de-eskalim të menjëhershëm të konfliktit, duke paralajmëruar se përshkallëzimi rrezikon të thellojë krizën humanitare dhe të rrisë numrin e viktimave civile në gjithë rajonin.
Lini një Përgjigje