FLASH
Shkruar nga Pamfleti
Autoritetet italiane arrestuan katër persona të dyshuar për sulmin me bombë ndaj gazetarit të emisionit Report. Prokuroria dyshon se atentati është kryer me porosi dhe kundrejt pagesës…
Katër persona janë arrestuar në provincat Napoli dhe Avellino në kuadër të hetimeve për atentatin me eksploziv ndaj gazetarit investigativ italian Sigfrido Ranucci, drejtues i emisionit Report në Rai 3. Lajmi u bë i ditur nga autoritetet italiane dhe u raportua nga mediat vendase.
Me urdhër të Gjykatës së Romës, tre të dyshuar janë vendosur në paraburgim, ndërsa një tjetër në arrest shtëpiak. Ata akuzohen, në forma të ndryshme përgjegjësie, për posedim, transport dhe përdorim të një mjeti shpërthyes, kërcënim dhe dëmtim të pronës, me rrethana rënduese për shkak të veprimit në grup dhe me metoda të ngjashme me ato të organizatave mafioze.
Hetimi nisi pas atentatit të 16 tetorit 2025 në Torvaianica, pranë Pomezias, kur një mjet shpërthyes shpërtheu përpara banesës së Ranuccit. Si pasojë u shkatërruan dy automjetet e gazetarit dhe u dëmtua muri rrethues i shtëpisë.
Sipas hetuesve, zbardhja e ngjarjes u mundësua përmes analizës së kamerave të sigurisë, ekspertizave tekniko-shkencore dhe shqyrtimit të të dhënave telefonike, të cilat lejuan rindërtimin e plotë të fazave përgatitore dhe ekzekutive të atentatit.
Prokuroria dyshon se grupi veproi me porosi të personave të tretë, të cilët ende nuk janë identifikuar. Sipas hetimeve paraprake, atentati u krye si "favor" kundrejt një shpërblimi financiar. Autorët e dyshuar, sipas prokurorisë, morën mbështetje logjistike, karta telefonike të dedikuara, asistencë ligjore dhe ishte planifikuar edhe një arratisje e mundshme jashtë Italisë.
Hetuesit pretendojnë gjithashtu se të dyshuarit tentuan të pengonin hetimet duke kërkuar pajisje përgjimi, duke shkatërruar karta SIM dhe duke koordinuar versione të përbashkëta mbrojtëse për të fshehur përfshirjen e tyre dhe identitetin e porositësve.
Ekspertizat e Karabinierëve dhe Institutit të Kriminalistikës (RIS) treguan se mjeti shpërthyes përmbante xhelatinë shpërthyese të përdorur në gurore, një material i vjetër, por me fuqi të lartë shkatërruese, që sipas hetuesve tregon ekzistencën e një rrjeti të paligjshëm furnizimi me eksploziv.
Një kamerë në autostradën SS148 Pontina identifikoi një Fiat 500X të marrë me qira në rajonin e Kampanias. Analiza e lëvizjes së automjetit dhe e sinjaleve telefonike tregoi se rruga e ndjekur nga telefonat e autorëve të dyshuar përputhej me itinerarin e makinës, si natën e atentatit ashtu edhe gjatë një vëzhgimi paraprak të zonës.
Gazetari Sigfrido Ranucci deklaroi për Rai 3 se tani pret zhvillimet e mëtejshme të hetimit për të kuptuar nëse ekzistojnë "nivele të tjera përgjegjësie". Ai falënderoi Karabinierët dhe prokurorët për punën hetimore, duke theksuar se duhet zbardhur i gjithë zinxhiri i organizimit të sulmit.
Edhe nënpresidenti i Këshillit të Ministrave, Alfredo Mantovano, përshëndeti arrestimet dhe shprehu shpresën që hetimet të çojnë edhe te porositësit e atentatit. Sipas tij, çdo sulm ndaj gazetarëve dhe lirisë së informimit duhet të sqarohet plotësisht, pa lënë asnjë dyshim.
Drejtori i Përgjithshëm i Rai-t, Giampaolo Rossi, dhe Këshilli i Administrimit i televizionit publik italian e cilësuan arrestimin e të dyshuarve një hap të rëndësishëm drejt zbardhjes së së vërtetës dhe riafirmuan mbështetjen për gazetarinë investigative.
Mes të arrestuarve janë Antonio Passariello, Marika De Filippi, Saverio Mutone dhe Pellegrino D'Avino, të gjithë me precedentë penalë. Prokuroria kishte kërkuar fillimisht edhe akuzën për masakër, por gjyqtari nuk e pranoi këtë kualifikim juridik.
Në dosjen hetimore përfshihet edhe një përgjim telefonik, ku një nga të dyshuarit dëgjohet të thotë: "Bombën e vendosa unë. Po bëjmë histori." Në një bisedë tjetër ai pretendon se kishte vepruar me porosi nga persona të tjerë, element që mbetet objekt i hetimeve në vazhdim. /Përshtatur nga RAI/
Lini një Përgjigje