FLASH
Shkruar nga Pamfleti
Forcat Mbrojtëse të Izraelit (IDF) deklaruan se do të vazhdojnë të shënjestrojnë çdo individ apo grup që konsiderohet kërcënim për sigurinë e shtetit, përfshirë edhe Udhëheqësin e ri Suprem të Iranit, Mojtaba Khamenei.
Në një deklaratë për mediat të martën, zëdhënësi i ushtrisë, Effie Defrin, tha se IDF nuk ka informacion mbi vendndodhjen apo gjendjen aktuale të Khameneit, i cili nuk është shfaqur publikisht që nga emërimi i tij. Megjithatë, ai theksoi se Izraeli do të vazhdojë operacionet ndaj çdo kërcënimi të perceptuar.
“Do të vazhdojmë të ndjekim këdo që përbën kërcënim për shtetin e Izraelit. Kushdo që ngre dorë kundër nesh nuk është imun. Do ta ndjekim, do ta gjejmë dhe do ta neutralizojmë", u shpreh Defrin.
Ai shtoi gjithashtu se në shënjestër do të mbeten edhe anëtarët e forcave paraushtarake iraniane Basij, duke theksuar se operacionet do të zhvillohen pa kufizime kohore apo gjeografike.
Më herët gjatë ditës, IDF njoftoi se ka vrarë komandantin e këtyre forcave, Gholamreza Soleimani.
Sipas ushtrisë izraelite, vendi po përgatitet për një fushatë të zgjatur ushtarake, e cila pritet të vazhdojë edhe gjatë festës hebraike të Pashkës, që këtë vit bie në fillim të prillit.
Lini një Përgjigje