FLASH
Shkruar nga Pamfleti
Gazeta hungareze 'Nepszava' shkruan se zhvillimet rreth Trupit Rregullator për Mediat Elektronike (REM) në Serbi mund të përbëjnë një goditje të re politike për presidentin serb, Aleksandar Vuçiç. Sipas saj, në këtë proces përmendet edhe ndikimi i politikës hungareze në luftën për kontrollin e mediave.
Sipas analizës së gazetës, presioni i Bashkimit Evropian për funksionalizimin e REM-it e ka detyruar qeverinë serbe të ndërmarrë hapa konkretë. Megjithatë, autoritetet në Beograd, sipas Nepszava, nuk kanë treguar gatishmëri reale për të garantuar pavarësinë e këtij institucioni.
Pas një bllokade të zgjatur dhe dorëheqjes së disa anëtarëve të pavarur, një pjesë e tyre kanë vendosur të rikthehen në Këshillin e REM-it, duke i hapur rrugë rifillimit të funksionimit të institucionit.
Gazeta vlerëson se ky zhvillim mund të ndikojë në ekuilibrat e skenës mediatike në Serbi, veçanërisht nëse anëtari i nëntë i Këshillit të REM-it zgjidhet nga një figurë e pavarur, që nuk është e afërt me pushtetin në Beograd.
Sipas Nepszava, një rol të rëndësishëm në këtë proces mund të luajë Peter Magyar, kryeministri hungarez, i cili, sipas gazetës, mund të ndikojë në ndryshimin e raporteve politike edhe në Serbi.
Analiza thekson se zgjedhja e anëtarit të ri të REM-it mund të jetë vendimtare, pasi emërimi i një kandidati që nuk mbështet linjën politike të pushtetit mund të dobësojë ndikimin e aleatëve të kryeministrit hungarez, Viktor Orbán dhe të sjellë ndryshime në peizazhin mediatik serb.
Në përfundim, Nepszava kritikon gjendjen e mediave në Serbi, duke vlerësuar se një pjesë e madhe e tyre janë shndërruar në instrumente të përballjeve politike dhe personale, ndërsa REM, për vite me radhë, nuk ka ushtruar në mënyrë efektive rolin e tij si autoritet rregullator i mediave elektronike.
Lini një Përgjigje