FLASH
Shkruar nga Pamfleti
Ish-presidenti iranian u vra nga sulmet amerikane dhe izraelite mbi Teheran.
Ish-presidenti i Iranit, Mahmoud Ahmadinejad, raportohet se është vrarë gjatë sulmeve të fundit mbi Teheran nga Shtetet e Bashkuara të Amerikës dhe Izraeli.
Raportohet se, Ahmadinejad ka humbur jetën si pasojë e goditjeve ajrore në kryeqytetin iranian. Autoritetet iraniane nuk kanë konfirmuar ende vdekjen e ish-presidentit. Po ashtu, nuk ka reagim publik nga administrata amerikane apo nga autoritetet izraelite lidhur me pretendimet për përfshirje në sulmet e raportuara.
Sipas raportimeve, sulmi goditi rezidencën e Ahmadinejadit në Narnak, në verilindje të Teheranit, duke vrarë atë dhe disa truproja të tij.
Mahmoud Ahmadinejad drejtoi Iranin në periudhën 2005–2013 dhe ishte një nga figurat më të spikatura të politikës iraniane në dy dekadat e fundit. Përpara se të bëhej president, Ahmadinejad shërbeu si guvernator i provincës Ardabil dhe kryetar bashkie i Teheranit
Kush është ish-presidenti i Iranit Mahmoud Ahmadinejad?
Mahmoud Ahmadinejad është një nga figurat më të debatueshme të politikës iraniane në dy dekadat e fundit. Ai shërbeu si President i Republikës Islamike të Iranit për dy mandate radhazi, nga viti 2005 deri në vitin 2013, në një periudhë të shënuar nga tensione të forta ndërkombëtare dhe përplasje të brendshme politike.
I lindur më 28 tetor 1956 në Garmsar, Ahmadinejad ka formim akademik në inxhinieri civile dhe transporti, duke mbajtur edhe gradë doktorature në këtë fushë. Para se të hynte në skenën e lartë politike, ai shërbeu në poste administrative dhe si guvernator provincial, ndërsa në vitin 2003 u emërua kryetar i Bashkisë së Teheranit.
Ahmadinejad u zgjodh president në vitin 2005, duke përfaqësuar një linjë konservatore dhe nacionaliste brenda establishmentit iranian. Gjatë mandatit të tij, Irani u përball me presion të shtuar ndërkombëtar për shkak të programit bërthamor, çka çoi në sanksione ekonomike nga Shtetet e Bashkuara dhe Bashkimi Evropian.
Retorika e tij e ashpër kundër Perëndimit dhe deklaratat polemizuese për Izraelin e vendosën shpesh në qendër të kritikave ndërkombëtare. Në planin e brendshëm, ai promovoi politika populiste, duke premtuar rishpërndarje të pasurisë dhe mbështetje për shtresat në nevojë.
Mandati i dytë i Ahmadinejadit, pas zgjedhjeve të vitit 2009, u shoqërua me akuza për manipulim elektoral. Rezultatet zyrtare që e shpallën fitues shkaktuan protesta të gjera në Iran, të njohura si “Lëvizja e Gjelbër”. Autoritetet i shtypën demonstratat, ndërsa situata thelloi ndarjet politike në vend.
Pas përfundimit të mandatit në vitin 2013, Ahmadinejad ka mbetur aktiv në jetën politike, duke tentuar të rikandidojë për postin e presidentit. Megjithatë, disa prej kandidaturave të tij nuk janë miratuar nga Këshilli i Gardianëve, institucioni që verifikon kandidatët në Iran.
Edhe pse jashtë pushtetit ekzekutiv, Mahmoud Ahmadinejad mbetet një figurë me peshë në diskursin politik iranian, i identifikuar me një periudhë të tensionuar në marrëdhëniet e Iranit me Perëndimin dhe me dinamika të forta të brendshme politike.
Kujtojmë se Udhëheqësi Suprem i Iranit Ajatollah Ali Khamenei u vra ditën e djeshme sulmeve masive ajrore të ndërmarra nga Shtetet e Bashkuara dhe Izraeli kundër Iranit. Televizioni shtetëror iranian e konfirmoi vdekjen e tij disa orë më vonë.
Khamenei, 86 vjeç, drejtoi Iranin për më shumë se tre dekada. Që nga Revolucioni Islamik i vitit 1979, vendi ka pasur vetëm dy udhëheqës supremë. Në këtë funksion, ai ushtronte autoritetin më të lartë shtetëror dhe fetar, si dhe mbante postin e komandantit suprem të forcave të armatosura, përfshirë Gardën Revolucionare.
Lini një Përgjigje