FLASH
Shkruar nga Pamfleti
Komandanti i përgjithshëm i forcave të armatosura të Ukrainës, Oleksandr Syrsky, ka deklaruar se forcat ruse po zhvillojnë ofensiva të përhapura në pothuajse të gjithë vijën e kontaktit në lindje dhe jug të vendit.
Në përfundim të një analize mbi operacionet ushtarake të muajit të kaluar, Syrsky theksoi se “situata operacionale mbetet e vështirë”, duke shtuar se në disa ditë ndodhin deri në 300 përplasje të armatosura.
Megjithatë, ai siguroi se ushtria ukrainase po mban presionin rus dhe po zbaton një strategji të “mbrojtjes aktive” për të frenuar avancimin e trupave të Moskës.
Sipas të dhënave të Shtabit të Përgjithshëm të Ukrainës, në frontin aktiv ndodhen rreth 710 mijë ushtarë rusë, një shifër që Rusia nuk ka mundur ta rrisë, pavarësisht një fushate të gjerë rekrutimi, për shkak të humbjeve të konsiderueshme që vlerësohen në rreth 1.000 ushtarë në ditë, të vrarë ose të plagosur.
Kievi paralajmëron se presioni do të vijojë të jetë i lartë, ndërsa mbështetja ndërkombëtare mbetet vendimtare për të ruajtur linjat e mbrojtjes.
Lini një Përgjigje