FLASH
Shkruar nga Pamfleti
Sekretari i Luftës përballet me pyetje nga Komisioni i Forcave të Armatosura, mes kritikash për mungesë transparence dhe kosto të larta
Sekretari amerikan i Mbrojtjes, Peter Hegseth, pritet të japë sot shpjegime mbi mënyrën e zhvillimit të luftës në Iran gjatë seancës së tij të parë dëgjimore në Kongres që nga nisja e konfliktit, i cili duket se ka hyrë në një fazë stagnimi, pavarësisht zgjatjes së armëpushimit nga presidenti Donald Trump.
Kreu i Pentagonit, i cili përballet me kritika të forta nga demokratët, do t’u përgjigjet pyetjeve të anëtarëve të Komisionit të Forcave të Armatosura të Dhomës së Përfaqësuesve, së bashku me shefin e Shtabit të Përbashkët të Forcave të Armatosura të SHBA-së, Dan Caine.
Që nga fillimi i luftës më 28 shkurt, ligjvënës nga të dyja partitë kanë kritikuar administratën për mungesë informimi, ndonëse zakonisht ata marrin përditësime të rregullta mbi çështje të sigurisë kombëtare me informacion të klasifikuar.
Hegseth, një figurë që ka shkaktuar përçarje brenda administratës Trump, pritet të përballet me pyetje të ashpra, ndërsa pasojat ekonomike të luftës ndihen globalisht dhe në opinionin publik amerikan, ku çmimet e karburanteve janë rritur ndjeshëm.
“Sekretari Hegseth më në fund do të paraqitet përpara Komisionit të Forcave të Armatosura këtë javë”, deklaroi deputetja demokrate Maggie Goodlander, duke shtuar “ka ardhur koha të japë përgjigje për një luftë të nisur me zgjedhje”, shtoi ajo.
Administrata Trump ka dhënë deklarata të ndryshme dhe shpesh kontradiktore mbi objektivat e luftës dhe mënyrën e përfundimit të saj.
Kërkesa për hetim
Negociatat për përfundimin e konfliktit duket se kanë ngecur, pavarësisht armëpushimit të vendosur tre javë më parë. Ndërkohë, Teherani ka bllokuar në praktikë lundrimin në Ngushticën e Hormuzit, një rrugë strategjike për tregtinë globale të hidrokarbureve, ndërsa Uashingtoni ka vendosur bllokadë ndaj porteve iraniane.
Marina amerikane ka dislokuar tre aeroplanmbajtëse në rajon, për herë të parë në më shumë se dy dekada.
Mënyra e drejtimit të luftës nga Hegseth ka shqetësuar që në fillim demokratët, të cilët kanë ndërmarrë gjashtë përpjekje për shkarkimin e tij, pa pasur gjasa reale për sukses.
Edhe shumë republikanë kanë shprehur pakënaqësi për faktin se administrata nuk konsultoi Kongresin përpara nisjes së luftës, ndonëse Kushtetuta amerikane kërkon miratimin e tij për shpalljen zyrtare të luftës.
Demokratët kanë dështuar disa herë të miratojnë një rezolutë që synon kufizimin e kompetencave të presidentit për ndërmarrjen e veprimeve ushtarake kundër Iranit.
Gjithashtu, më shumë se dhjetë ligjvënës demokratë kërkuan javën e kaluar nisjen e një “hetimi zyrtar dhe të menjëhershëm” për vdekjen e gjashtë ushtarëve amerikanë në Kuvajt gjatë ditëve të para të luftës, duke pretenduar se sekretari “ka mashtruar publikun mbi rrethanat e sulmit”.
Në total, 13 ushtarë amerikanë janë vrarë që nga 28 shkurti dhe rreth 400 të tjerë janë plagosur.
Rritje e buxhetit ushtarak
Ligjvënësit mund të pyesin gjithashtu për koston e luftës, si në aspektin fiskal ashtu edhe për përdorimin intensiv të raketave, rezervat e të cilave janë të kufizuara, duke ngritur shqetësime për mundësinë e shterimit të armëve strategjike të SHBA-së.
Seanca dëgjimore lidhet zyrtarisht me kërkesën e administratës për rritjen me 42% të buxhetit të mbrojtjes, për ta çuar atë në 1.5 trilionë dollarë deri në vitin 2027.
Hegseth mund të përballet gjithashtu me pyetje lidhur me largimet e fundit të zyrtarëve të lartë ushtarakë dhe përdorimin e inteligjencës artificiale nga forcat e armatosura.
Lini një Përgjigje