FLASH
Shkruar nga Pamfleti
Mbreti Charles dhe Donald Trump përdorën humor dhe batuta gjatë fjalimeve në një darkë shtetërore, duke i dhënë një ton më të lehtë një ceremonie zyrtare.
Trump e nisi fjalën me një koment ironik për reagimin në Kongres: “Dua ta përgëzoj Charles për një fjalim fantastik sot në Kongres… Ai i bëri demokratët të ngrihen në këmbë, unë nuk mund ta bëj kurrë këtë.”
Mbreti iu përgjigj me një vëzhgim me nota humori për ndryshimet në Shtëpinë e Bardhë: “Nuk mund të mos vë re ‘rregullimet’ në Krahun Lindor, zoti President, pas vizitës suaj në Kështjellën Windsor vitin e kaluar.”
Ai përfshiu edhe një referencë historike, duke thënë: “Më vjen keq të them se ne britanikët, sigurisht, kemi bërë përpjekjen tonë për ‘zhvillim imobiliar’ të Shtëpisë së Bardhë në vitin 1814”.
Në vijim, Charles iu kthye një deklarate të mëparshme të Trump: “Ju së fundmi thatë, zoti President, se nëse nuk do të ishte për Shtetet e Bashkuara, vendet evropiane do të flisnin gjermanisht. Guxoj të them se, nëse nuk do të ishte për ne, ju do të flisnit frëngjisht…!”
Në përmbyllje të fjalimit të tij, ai citoi një varg nga Shakespeare dhe falënderoi Trump për “darkën e shkëlqyer”, duke shtuar me shaka se ishte një “përmirësim i ndjeshëm nga “Festa e çajit në Boston”, në referencë të rebelëve amerikanë që hodhën çaj britanik në port gjatë periudhës koloniale.
Vizita e Mbretit Charles III në Shtetet e Bashkuara ishte menduar si një festë, për 250-vjetorin e Amerikës, për lidhjet e qëndrueshme anglo-amerikane dhe për të ashtuquajturën “marrëdhënie speciale”. Megjithatë, ajo është konsideruar edhe si një mision për të përmirësuar marrëdhëniet.
Gjendja aktuale e marrëdhënieve SHBA–Britani është e tensionuar, si pasojë e hezitimit të Londrës për të mbështetur plotësisht luftën e përbashkët SHBA-Izrael kundër Iranit. Në këtë kontekst, qëllimi i Mbretit ishte të zbusë këto tensione përmes një qasjeje diplomatike, veçanërisht përmes fjalimit të tij para të dy dhomave të Kongresit.
Lini një Përgjigje