FLASH
Shkruar nga Pamfleti
Autoritetet italiane kanë realizuar një tjetër goditje të rëndësishme ndaj trafikut ndërkombëtar të drogës, duke sekuestruar 770 kilogramë kokainë në portin e Vado Ligure, në veriperëndim të Italisë.
Operacioni u zhvillua nga Guardia di Finanza në bashkëpunim me autoritetet doganore. Sipas njoftimit zyrtar, kokaina me pastërti të lartë ishte fshehur brenda një kontejneri frigoriferik, mes dhjetëra paletave me banane.
Ngarkesa kishte mbërritur nga një prej porteve kryesore të Ekuadorit, ndërsa kontrolli i ushtruar nga autoritetet çoi në zbulimin e lëndës narkotike.
Sipas vlerësimeve të policisë italiane, droga e sekuestruar do të kishte një vlerë prej rreth 250 milionë eurosh në tregun e paligjshëm.
Autoritetet e konsiderojnë këtë si një nga operacionet më të rëndësishme kundër trafikut të drogës të zhvilluara në portin e Vado Ligure në vitet e fundit.
Ky është sekuestrimi i dytë i madh i kokainës në të njëjtin port brenda pak javësh. Më pak se tre javë më parë, forcat italiane të rendit bllokuan 340 kilogramë kokainë, me një vlerë të përllogaritur prej rreth 120 milionë eurosh në tregun e zi.
Hetimet janë në vijim për të identifikuar organizatën kriminale që qëndron pas transportit të drogës, si edhe destinacionin përfundimtar të ngarkesës.
Lini një Përgjigje