FLASH
Shkruar nga Pamfleti
Presidenti amerikan Donald Trump do të mbajë sot një konferencë të jashtëzakonshme për shtyp në Shtëpinë e Bardhë, në orën 20:00 me orën e Evropës Qendrore, njoftoi zyrtarisht presidenca amerikane.
Njoftimi vjen në një klimë të tensionuar brenda aleancës perëndimore, pasi vetë Trump sulmoi sërish aleatët e NATO-s në një postim në rrjetin e tij Truth Social, duke deklaruar se vetëm falë tij aleanca nuk është shpërbërë.
“Asnjë person apo president nuk ka bërë më shumë për NATO-n sesa Donald J. Trump”, shkroi ai, duke iu referuar vetes në vetën e tretë, siç bën shpesh në retorikën e tij politike.
“Po të mos kisha ardhur unë, NATO nuk do të ekzistonte sot! Do të ishte në arkivin e historisë. E trishtueshme, por e vërtetë!”, përfundon postimi, i shoqëruar me tre pikëçuditëse që nënvizojnë tonin sfidues dhe triumfalist.
Trump ka qenë përherë një kritik i ashpër i NATO-s, duke e akuzuar se mbron shtete që nuk kontribuojnë mjaftueshëm financiarisht, ndërkohë që SHBA, sipas tij, ka mbajtur barrën më të madhe për dekada.
Kjo deklaratë e fundit vjen në një moment kritik, ku tensionet ndërkombëtare janë në rritje, nga Arktiku te Lindja e Mesme, dhe roli i NATO-s shihet si thelbësor në ruajtjen e ekuilibrave globalë. Komentet e Trump kanë rritur shqetësimin në disa kryeqytete evropiane mbi angazhimin real të SHBA-së ndaj nenit 5 të traktatit të NATO-s, në rast të një krize ushtarake.
Sytë tani janë kthyer drejt konferencës së orës 20:00, ku pritet që Trump të sqarojë pozicionin e tij mbi të ardhmen e NATO-s, rolin e SHBA-së në aleancë dhe sfidat aktuale globale.
Lini një Përgjigje