FLASH
Shkruar nga Pamfleti
Presidenti amerikan Donald Trump ka pritur Mbretin Charles dhe Mbretëreshën Camilla në Shtëpinë e Bardhë, në ditën e dytë të vizitës së tyre në Shtetet e Bashkuara. Në ceremoninë zyrtare të mirëseardhjes morën pjesë figura të larta të administratës amerikane, përfshirë zëvendëspresidentin J.D. Vance dhe Sekretarin e Shtetit Marco Rubio.
Gjatë fjalës së tij, Trump e cilësoi pritjen si një nder dhe iu referua edhe vizitave të mëparshme në Mbretërinë e Bashkuar, duke përmendur veçanërisht qëndrimin në Kështjellën Windsor. Ai theksoi marrëdhëniet historike mes dy vendeve, duke i quajtur “dhurata të rralla” ndikimet kulturore që Shtetet e Bashkuara kanë trashëguar nga Britania.
Në një moment më informal, presidenti amerikan bëri shaka për motin me shi në Uashington, duke e quajtur atë një “ditë tipike britanike”. Ai komentoi gjithashtu për aksentin e Mbretit Charles, duke thënë se ai do të tërhiqte vëmendjen gjatë fjalimit të tij në Kongres.
Trump ndau edhe një kujtim personal, duke treguar se nëna e tij ndiqte me interes ceremonitë e familjes mbretërore britanike. Sipas tij, ajo shprehte admirim të veçantë për Charlesin, duke e cilësuar si “shumë simpatik”.
"Sa herë që Mbretëresha merrte pjesë në një ceremoni... nëna ime do të mbërthehej pas televizorit dhe do të thoshte: 'Shiko, Donald, shiko sa e bukur është kjo'. Ajo e donte shumë familjen. Por gjithashtu e mbaj mend që tha shumë qartë, Charles... ai është kaq i lezetshëm... nëna ime kishte një simpati për Charles. A mund ta besoni?"-tha Trump.
Në ceremoni ishin të pranishëm edhe përfaqësues të tjerë të lartë amerikanë dhe britanikë, si dhe figura të njohura nga bota e biznesit. Vizita e Mbretit Charles në SHBA konsiderohet pjesë e përpjekjeve për të forcuar marrëdhëniet mes dy vendeve.
Lini një Përgjigje