FLASH
Shkruar nga Pamfleti
Përplasjet me zyrtarë të lartë, konfliktet për Venezuelën dhe tensionet në rrethin e brendshëm të Trump dobësojnë pozicionin e ish-diplomatit
Richard Grenell është një emër jo pak i njohur në mjedisin politik shqiptar. Ai është shfaqur herë si “gomone” shpëtimi për Sali Berishën, pas shpalljes “non grata” të tij nga Departamenti i Shtetit në kohën e Presidencës Biden, ashtu edhe si një mi ki Kryeministrit Edi Rama. Përpara zgjedhjes së Trump si President i SHBA-së, demokratët e Berishës shpresonin se në administratën e tij, Grenell do të merrte pozicionin e Sekretarit të Shtetit dhe referuar deklaratave të tij në Tiranë lidhur me “non grata-n”, Berisha dhe familja e tij do të dilnin nga lista e zezë e SHBA. Në anën tjetër, Grenell u shfaq si një “mik” i Edi Ramës, gjë që është pohuar edhe nga Kryeministri.
Gazeta britanike Daily Mail në një artikull ka bërë një analizë të plotë mbi ngritjen dhe rënien e Richard Grenell, ish-ambasadorit të SHBA në Gjermani gjatë presidencës së parë të Trump, dhe më pas pozicionit si drejtues i Inteligjencës Kombëtare dhe i dërguar i posaccëm i Presidentit amerikan.
“Daily Mail” shkruan referuar burimeve diplomatike se ambicia e Grenell ka qenë posti i Sekretarit të Shtetit. Megjithatë, sipas një ish-zyrtari të administratës Trump, perceptimet negative ndaj tij brenda administratës e bëjnë këtë objektiv të pamundur në rrethanat aktuale.
Kombinimi i stilit konfrontues, përplasjeve të brendshme dhe interesave të ndërthurura private ka kufizuar ndikimin e tij në mandatin e dytë të Trump.
Artikulli i Daily Mail
Richard Grenell punoi për vite me radhë për t’u ngjitur në radhët e ashpra të lëvizjes MAGA, duke arritur në mënyrë të befasishme të drejtojë aparatin kryesor të inteligjencës amerikane në vitin 2020.
Gjashtë vjet më vonë, në kulmin e pushtetit të Donald Trump, ai drejton një teatër, tashmë edhe ky rol është vënë në pritje.
Karriera e Grenell mori një tjetër kthesë të fortë këtë muaj, kur Trump njoftoi planet për ta mbyllur Qendrën Kennedy për një projekt masiv rindërtimi dyvjeçar. Vendimi vjen pas një viti trazirash të brendshme dhe anulimesh të profilit të lartë që kanë shoqëruar institucionin gjatë drejtimit të tij. Tani “ristrukturimi total” e lë ish-shefin e inteligjencës me prestigjin e rrënuar, si në kuptimin figurativ ashtu edhe në atë praktik.
“U befasuam të gjithë. Kam frikë se do ta shembin krejtësisht,” tha një burim që ka punuar me Grenell në Qendrën Kennedy.
Grenell, 59 vjeç, i lindur në Miçigan dhe shfaqur hapur si homoseksual, paraqitet si një figurë politike sfiduese, një diplomat i ashpër që anashkalon kanalet tradicionale për të dhënë rezultate për një audiencë të vetme: presidentin.
Megjithatë, ndërsa operacioni amerikan për kapjen e Nicolás Maduro ndryshoi peizazhin ndërkombëtar, ai që dikur konsiderohej kandidat i sigurt për një post të lartë në kabinet u përjashtua nga rrethi i brendshëm i Trump.
Dy ish-kolegë e kanë cilësuar si “jashtëzakonisht ambicioz”, ndërsa katër burime diplomatike që kanë punuar ngushtë me të i thanë Daily Mail se personaliteti i tij i ashpër dhe temperamenti i shkurtër e kanë lënë jashtë vendimmarrjeve më të ndjeshme të politikës së jashtme.
Përplasja më e rëndësishme e Grenell lidhej me Venezuelën, një çështje për të cilën ai u emërua i dërguar special në fillim të mandatit të dytë të Trump.
Grenell negocioi lirime të të burgosurve dhe duke shtyrë përpara një qasje “pragmatike” që favorizonte marrëveshje nafte në vend të ndryshimit të regjimit, nuk pati përparime konkrete.
Por ai u përball me Sekretarin e Shtetit Marco Rubio, i cili kërkoi “presion maksimal” dhe rritje të pranisë ushtarake, një strategji që përfundoi me kapjen e befasishme të Maduro-s.
Ndërsa Rubio zbatonte këtë vizion më të ashpër, Grenell raportohet se vazhdonte të mbështeste një “marrëdhënie të ndryshme” me liderin venezuelian, të bazuar në diplomaci dhe presion të kombinuar.
“Edhe María Machado refuzoi ta takonte,” tha një diplomat amerikan që ka punuar me Grenell, duke shtuar “na u tha se ajo nuk donte të merrej me të dhe nuk i pëlqente ajo që ai përfaqësonte.”
Një diplomat tjetër tha se Machado e konsideronte Grenell si figurë pa peshë në Amerikën Latine dhe nuk donte të përdorej për qëllime simbolike.
Dy burime diplomatike dhe një burim në Departamentin e Shtetit i thanë Daily Mail se Rubio, me mbështetjen e shefes së stafit Susie Wiles, arriti ta largojë plotësisht Grenell nga dosja e Venezuelës.
Por rënia e Grenell, sipas burimeve, nisi më herët gjatë fushatës zgjedhore. Një burim pranë Shtëpisë së Bardhë pretendon se Grenell përmendi veten si kandidat për nënpresident pranë këshilltarëve në Mar-a-Lago.
Në Konventën Kombëtare Republikane, ai pati një debat të ashpër me Susie Wiles për kohën e fjalimit të tij. Sipas burimit, përplasja ishte aq intensive sa Wiles mezi mbajti lotët.
Grenell e mohoi këtë incident dhe tha se ruan marrëdhënie miqësore me Wiles. Ai deklaroi se ajo do ta konfirmonte se historia nuk ishte e vërtetë, por sipas Daily Mail, një konfirmim i tillë nuk erdhi.
Chris LaCivita, bashkëdrejtues i fushatës së Trump në vitin 2024, i tha gazetës se informacionet e tilla janë të pavërteta.
Sipas raportimit, brenda rrethit të brendshëm të Trump ekziston perceptimi se Grenell mund t’i krijojë administratës probleme për shkak të angazhimeve të tij jashtë vendit.
Në një rast, ai organizoi udhëtimin e presidentit serb Aleksandar Vuçiç në Florida për një takim me Trump në maj 2025, por takimi nuk u zhvillua. Burime thonë se Susie Wiles e bllokoi takimin. Versioni zyrtar nga Beogradi ishte se Vuçiç u kthye për arsye shëndetësore.
Diplomatë të njohur me situatën thanë se interesat e Grenell në Serbi lidhen me bashkëpunimin me firmën e investimeve Affinity Partners të Jared Kushner. Ai ka ndërmjetësuar një projekt prej 500 milionë dollarësh për ndërtimin e një hoteli luksoz dhe kompleksi përkujtimor në qendër të Beogradit, me një qira 99-vjeçare nga shteti serb. Projekti mund të jetë pezulluar.
Affinity Partners nuk iu përgjigj kërkesës për koment.
Grenell vazhdon gjithashtu të drejtojë firmën private Capitol Media Partners. Sipas faqeve publike që ndjekin pasurinë, vlera neto e tij vlerësohet mes 1 dhe 5 milionë dollarësh.
Që nga emërimi i tij në shkurt në krye të Qendrës Kennedy, institucioni është përballur me polemika, përfshirë akuza për shkurtime buxheti, reagime për ndryshimin e emrit në “Trump-Kennedy Center” dhe përplasje me artistë të njohur.
Një numër në rritje artistësh kanë bojkotuar skenën, duke anuluar shfaqje ndërsa shitjet e biletave kanë rënë. Grenell ka akuzuar CNN dhe The Washington Post se kanë nxitur reagimin negativ.
Një diplomat që ka punuar me të në Venezuelë i tha Daily Mail: “në fillim ai shihej si zgjidhësi i problemeve, që do të udhëtonte nëpër botë për të rregulluar situata… por kjo u shua”.
Sipas burimeve, Grenell u ka thënë miqve se planifikon të largohet nga posti më vonë këtë vit.
Ambicia e tij, sipas një diplomati veteran, ka qenë posti i Sekretarit të Shtetit. “Por nuk e shoh të ndodhë. Trump e di se shumë njerëz kanë pikëpamje negative për të,” tha ai për Daily Mail. /Pamfleti/
Po Berisha ku e ka mik? Cdo gje lidhje me berishen. Lat nam
Ju legena ! Kur doli edhe miku i Berishes ky ? Apo dezinformacioni duhet me se s'ben ??? Ky eshte nje ish aktor qe ka mik Ramen dhe Vucic ne Ballkan !