FLASH
Shkruar nga Pamfleti
FSB njofton se ka parandaluar dërgimin e mjeteve shpërthyese ndaj ushtarakëve rusë dhe punonjësve të industrisë së mbrojtjes, ndërsa pretendon se i dyshuari vepronte sipas udhëzimeve të shërbimeve speciale ukrainase.
Shërbimi Federal i Sigurisë i Rusisë (FSB) njoftoi se ka parandaluar një plan të dyshuar sabotimi, në të cilin pajisje shpërthyese të improvizuara ishin fshehur brenda shisheve të parfumit dhe do t'u dërgoheshin ushtarakëve rusë.
Sipas Qendrës për Marrëdhënie me Publikun të FSB-së, objektiv i sulmeve ishin ushtarakë rusë që marrin pjesë në luftën në Ukrainë, si edhe punonjës të industrisë së mbrojtjes. Autoritetet ruse identifikuan si të dyshuar një shtetas rus, 23 vjeç.
FSB bëri të ditur se i riu u arrestua në mars të vitit 2025 dhe, sipas hetimeve të autoriteteve ruse, ai vepronte nën udhëzimet e shërbimeve speciale ukrainase.
ФСБ сообщила о предотвращении рассылки через "Почту России" взрывных устройств в парфюмерных наборах военнослужащим:https://t.co/VG3Qo0qb6E
— ТАСС (@tass_agency) July 6, 2026
Видео: ЦОС ФСБ России/ТАСС pic.twitter.com/pVAQCm1Gs5
Sipas versionit të FSB-së, i dyshuari mori nga vende të fshehta në Çeljabinsk pajisjet shpërthyese të improvizuara, të fshehura në shishe parfumi. Më pas, ai dërgoi pako drejt Moskës, Voronezhit, rajonit të Krasnodarit dhe rajonit të Saratovit. Autoritetet ruse deklarojnë se të gjitha pajisjet u neutralizuan nga forcat e sigurisë.
FSB pretendon gjithashtu se, pas përfundimit të detyrës, personat që e drejtonin ndërprenë çdo komunikim me të dyshuarin dhe se ai nuk mori pagesën e premtuar.
Ndaj 23-vjeçarit është ngritur çështje penale për trafikim të paligjshëm të lëndëve shpërthyese, tentativë për akt terrorist dhe tradhti ndaj shtetit. Nëse shpallet fajtor, ai përballet edhe me mundësinë e dënimit me burgim të përjetshëm.
Lini një Përgjigje