FLASH
Shkruar nga Pamfleti
Katër prej viktimave janë identifikuar nga Pentagoni. Sulmi goditi një qendër operative ushtarake pranë portit të Shuaiba, pa paralajmërim dhe pa sistem mbrojtjeje ndaj dronëve
Pentagoni identifikoi katër nga gjashtë ushtarët amerikanë që humbën jetën të dielën në një sulm me dron të atribuar Iranit.
Viktimat janë: kapiteni Cody Khork, 35 vjeç, rreshteri i parë Noah Tietjens, 42 vjeç, rreshterja e parë Nicole Amor, 39 vjeç dhe rreshteri Declan Coady, 20 vjeç.
Të katër shërbenin në njësinë 103rd Sustainment Command, një njësi rezervë e ushtrisë amerikane me bazë në shtetin e Iowa. Pentagoni nuk ka bërë ende publik identitetin e dy ushtarëve të tjerë që u vranë në të njëjtin sulm.
Sipas informacioneve të publikuara nga CNN, droni goditi një qendër të përkohshme operative taktike pranë portit të Shuaiba në Kuvajt. Në momentin e sulmit ushtarët shërbenin në kuadër të komandës 1st Theater Sustainment Command.
Burime të njohura me situatën përshkruan ndërtesën si një strukturë të përbërë nga një trailer i madh me hapësira zyrash brenda. Objekti ishte i rrethuar me barriera betoni, të përdorura zakonisht për të mbrojtur strukturat ushtarake nga makina-bombë ose pajisje shpërthyese të improvizuara. Megjithatë, objekti nuk kishte mbrojtje nga sulmet ajrore me dronë apo raketa.
Burimet konfirmuan se nuk pati sirenë alarmi apo paralajmërim përpara goditjes, çka nuk u dha kohë ushtarëve të strehoheshin në bunker.
Komanda 1st Theater Sustainment Command, me bazë në Fort Knox në Kentucky, koordinon furnizimin dhe mbështetjen logjistike të forcave amerikane në Lindjen e Mesme. Njësia menaxhon transportin e municioneve, karburantit, ujit, ushqimit dhe pjesëve të riparimit, si dhe operacionet e porteve dhe fluturimeve ushtarake në rajon.
Lini një Përgjigje