FLASH
Shkruar nga Pamfleti
Udhëheqësi i opozitës në Senatin e Pakistanit, Raja Nasir Abbas, kërkoi në parlament që qeveria të tërhiqet nga “Gaza Peace Board” pas sulmeve të përbashkëta të SHBA dhe Izraelit ndaj Iranit. Deklarata e tij erdhi mes protestave masive pro-Iran në disa qytete të vendit.
Protestuesit sulmuan konsullatën amerikane në Pakistan. Përplasjet me forcat e sigurisë çuan në vdekjen e më shumë se 30 protestuesve pro-Iran, sipas raportimeve nga terreni. Autoritetet nuk kanë publikuar ende një bilanc zyrtar përfundimtar.
Në fjalën e tij në Senat, Abbas iu referua presidentit amerikan Donald Trump dhe deklaroi se ai po krijon paqëndrueshmëri globale përmes përdorimit të forcës. Ai theksoi se Pakistani duhet të largohet nga bordi i paqes për Gazën.
Aleanca opozitare, ku bën pjesë edhe partia e ish-kryeministrit Imran Khan, kritikoi qeverinë menjëherë pas sulmeve ndaj Iranit. Opozita deklaroi se vendimi për t’iu bashkuar “Gaza Peace Board” u mor pas dyerve të mbyllura, pa konsultim me parlamentin dhe pa debat publik.
Reagime pati edhe nga figura diplomatike. Ish-ambasadorja e Pakistanit në OKB dhe SHBA, Maliha Lodhi, shkroi në rrjetin X se Pakistani duhet të largohet nga bordi, duke argumentuar se ai u krijua dhe drejtohet nga një administratë që ka ndërmarrë sulme ndaj disa vendeve dhe që, sipas saj, mban përgjegjësi për veprimet e Izraelit në Gaza.
Muajin e kaluar, kryeministri i Pakistanit Shehbaz Sharif mori pjesë në mbledhjen inauguruese të bordit për Gazën dhe e cilësoi Trump si “njeri të paqes”. Vendimi i qeverisë për t’iu bashkuar këtij mekanizmi ka nxitur reagime të forta politike dhe protesta në rrugë, ndërsa tensionet rajonale vazhdojnë të rriten.
Lini një Përgjigje