FLASH
Shkruar nga Pamfleti
I dyshuari për vrasjen e aktivistit konservator amerikan, Charlie Kirk u arrestua pasi i rrëfeu krimin babait të tij, i cili ndihmoi në kapjen e 22-vjeçarit, njoftuan autoritetet.
Tyler Robinson ndodhet në paraburgim prej orës 22:00, sipas kohës lokale, pasi për 33 orë, ishte shpallur në kërkim.
"E kapëm", u tha gazetarëve guvernatori i Utah-ut, Spencer Cox.
Mbrëmjen e 11 shtatorit, një anëtar i familjes së Tyler Robinson kontaktoi një mik të familjes, i cili më pas u lidh me Zyrën e Sherifit të Qarkut të Uashingtonit, duke dhënë informacionin se Robinson u kishte rrëfyer ose kishte lënë të kuptohej se kishte kryer krimin.
Anëtari i familjes raportohet të ketë qenë babai i tij, sipas zyrtarëve të zbatimit të ligjit që folën për CBS neës , të cilët e kishin njohur atë nga fotot e publikuara gjatë kërkimit.
Gjatë intervistës së tij me Fox News, Presidenti i SHBA-së Donald Trump e konfirmoi këtë, duke thënë se i dyshuari ishte dorëzuar nga "dikush shumë i afërt".
Trump tha se personi që e njohu të dyshuarin shkoi te “babai”, i cili më pas “e bindi të birin”.
Dy burime të zbatimit të ligjit i thanë CBS se Robinson i kishte rrëfyer të atit, i cili më pas e kishte nxitur të dorëzohej.
Robinson i pranoi të atit se ishte ai personi në foto, thanë burimet e CBS.
Babai i Robinsonit e inkurajoi të birin të dorëzohej vetë, por 22-vjeçari i tha se do të preferonte të vetëvritej.
Babai kontaktoi një mik të familjes, i cili thuhet se ishte një pastor i kishës, dhe dyshja u përpoq ta qetësonte Robinsonin.
Pastori më pas kontaktoi Zyrën e Sherifit të Qarkut të Uashingtonit me informacionin.
Akuzat penale ndaj 22-vjeçarit pritet të ngrihen të martën.
Robinson do të akuzohet për vrasje të rëndë, pengim të drejtësisë dhe krim të rëndë.
Robinson ishte një student i vitit të tretë në një program praktikash elektrike në Kolegjin Teknik Dixie në jugperëndim të Utah-ut, ku jetonte, tha për BBC-në një zëdhënës i Universitetit të Luginës së Utah-ut (UVU).
Ai nuk ndoqi studimet në Universitetin e Luginës së Utah-ut, ku ndodhën të shtënat.
Robinson thuhet se ishte një nxënës i shkëlqyer, me Sky News që verifikoi ato që duket se janë të dhëna shkollore të postuara në vitin 2020 nga nëna e tij, të cilat tregojnë një mesatare prej 4.0, ekuivalente me notat e plota 100% në Mbretërinë e Bashkuar.
Cox tha në një konferencë për shtyp se autoritetet nuk kanë informacione që do të çonin në hetime të mëtejshme.
Kirk, 31 vjeç, një aktivist i krahut të djathtë dhe aleat i ngushtë i Donald Trump , po fliste para një turme si pjesë e turit të tij politik të tubimeve kur u godit në qafë nga një plumb.
Vrasja e babait të dy fëmijëve ka shkaktuar një shpërthim zemërimi nga konservatorët amerikanë dhe ka ushqyer frikën e dhunës së mëtejshme politike.
Sipas autoriteteve, autori qëlloi një herë nga çatia. Videoja tregon personin duke ecur nëpër bar dhe duke kaluar rrugën përpara se të zhdukej.
"Mund t'ju them se kjo ishte një ngjarje e synuar" tha Robert Bohls, agjenti i lartë i FBI-së në Salt Lake City.
Hetuesit thanë se nuk është përcaktuar asnjë motiv për vrasjen.
Por Cox, guvernatori i Utah-s, tha se provat përfshinin gravura në gëzhoja plumbash me fuqi të lartë që besohet se është përdorur në sulm, përfshirë një që thoshte: “Hej, fashist”.
Lini një Përgjigje