FLASH
Shkruar nga Pamfleti
SHBA ka dislokuar në Britaninë e Madhe një avion të specializuar për detektimin e shpërthimeve bërthamore, tip WC-135R Constant Phoenix, në një kohë kur Presidenti amerikan Donald Trump po shqyrton mundësinë e ndërmarrjes së një sulmi ushtarak ndaj Iranit.
Lëvizja është raportuar nga “Daily Mail”, që nënvizon se ky është një zhvillim jashtëzakonisht i rrallë, duke qenë hera e tretë në 40 vjet që një avion i tillë stacionohet në një bazë ajrore britanike.
WC-135R, i njohur ndryshe si “avioni që nuhat bërthamorët”, përdoret zakonisht në zonat pranë kufirit me Rusinë për të monitoruar ndotjet radioaktive dhe aktivitetet bërthamore të dyshimta. Dërgimi i tij në Britani është një tregues serioz se Shtetet e Bashkuara janë në fazë përgatitjeje të avancuar për një skenar ushtarak, potencialisht të lidhur me Republikën Islamike të Iranit.
Fotografi të publikuara nga e njëjta media tregojnë edhe praninë e komandos amerikane, që kryen stërvitje zbarkimi me litarë nga avionë ushtarakë V-22 Osprey, një teknikë e përdorur për operacione të shpejta pas vijës së frontit, tipike për ndërhyrje elitare dhe goditje të befasishme.
Zhvillimet ndodhin në një klimë të nxehtë diplomatike dhe ushtarake. Vetëm pak ditë më parë, Trump zhvilloi takime të koordinuara me zyrtarë të lartë nga Izraeli dhe Arabia Saudite, duke diskutuar konkretisht skenarë të mundshëm për sulme të kufizuara ndaj objektivave iraniane. Këto zhvillime përkojnë me rritjen e pranisë ushtarake amerikane në Lindjen e Mesme dhe përforcimin e bazave të saj në rajon.
Dislokimi i WC-135R dhe aktiviteti i forcave speciale janë sinjale që i tejkalojnë kornizat e stërvitjes ose të patrullimeve të zakonshme. Zgjerimi i operacioneve në Evropë, e veçanërisht në Mbretërinë e Bashkuar, vjen si pjesë e një strategjie më të gjerë të mbajtjes në gatishmëri të aleancave të NATO-s, nëse kriza me Iranin përshkallëzohet në konfrontim të drejtpërdrejtë.
Për vende si Shqipëria, një aleate e fortë e SHBA dhe anëtare e NATO-s, këto zhvillime kërkojnë vëmendje të shtuar strategjike dhe diplomatike, për të vlerësuar ndikimet e mundshme në sigurinë rajonale, por edhe në dinamikat gjeopolitike që përfshijnë Lindjen e Mesme dhe Evropën Juglindore.
Lini një Përgjigje