FLASH
Shkruar nga Pamfleti
Shtetet e Bashkuara përdorën bombardues strategjikë B-1 në sulmet ajrore ndaj Iranit në kuadër të operacionit të koduar “Epic Fury”, konfirmoi të hënën Komanda Qendrore Amerikane (CENTCOM).
Sipas analistëve ushtarakë, avionët B-1 u ngritën nga baza ajrore Ellsworth në Dakotën e Jugut dhe përshkuan Atlantikun dhe Mesdheun përpara se të godisnin objektiva në territorin iranian. Misioni u mbështet nga avionë cisternë për furnizim me karburant në ajër, duke mundësuar fluturim në distanca ndërkontinentale pa ndalesë.
Njoftimi për përdorimin e B-1 vjen pasi CENTCOM konfirmoi të dielën se në operacion morën pjesë edhe bombarduesit stealth B-2. Këta avionë konsiderohen ndër platformat më të avancuara të Forcave Ajrore Amerikane, me aftësi për të depërtuar mbrojtjen ajrore dhe për të goditur objektiva me precizion të lartë.
Last night, U.S. B-1 bombers, struck deep inside Iran to degrade Iranian ballistic missile capabilities. As the President stated, "we're going to destroy their missiles and raze their missile industry to the ground." pic.twitter.com/tIkIo5ugWv
— U.S. Central Command (@CENTCOM) March 2, 2026
B-1 Lancer është një bombardues me rreze të gjatë veprimi dhe kapacitet të lartë ngarkese, i projektuar për të transportuar një gamë të gjerë armatimesh konvencionale. Ndërsa B-2 Spirit operon me teknologji të uljes së dukshmërisë (stealth), duke i lejuar të shmangë radarët dhe të kryejë goditje në thellësi të territorit armik.
Përdorimi i këtyre platformave strategjike sinjalizon shkallën dhe rëndësinë e operacionit amerikan, si dhe gatishmërinë e Uashingtonit për të projektuar fuqi ushtarake në distanca të mëdha. Përfshirja e bombarduesve me rreze të gjatë tregon gjithashtu për një koordinim të gjerë operacional dhe një përshkallëzim të dimensionit ushtarak të krizës.
Lini një Përgjigje