FLASH
Shkruar nga Pamfleti
Kryeministri i Greqisë, Kyriakos Mitsotakis, u takua sot në Ankara me presidentin e Turqisë, Recep Tayyip Erdogan, në kuadër të mbledhjes së 6-të të Këshillit të Lartë të Bashkëpunimit mes dy vendeve.
Dy liderët bashkëkryesuan seancën me pjesëmarrjen e ministrave të jashtëm si koordinatorë, si dhe të ministrave përgjegjës për ekonominë dhe financat, rendin e brendshëm dhe migracionin, mbrojtjen civile, kulturën dhe turizmin, arsimin, zhvillimin, infrastrukturën, transportin dhe tregtinë.
Në deklaratën e përbashkët, Athina dhe Ankaraja riafirmuan vendosmërinë për të forcuar marrëdhëniet miqësore dhe fqinjësinë e mirë, në përputhje me “Deklaratën e Athinës për Marrëdhënie Miqësore dhe Fqinjësi të Mirë”, të nënshkruar në dhjetor 2023. Të dyja palët u zotuan të zgjerojnë fushat e bashkëpunimit dhe të shmangin burimet e pajustifikuara të tensionit, me qëllim parandalimin e përshkallëzimeve.
Në planin ekonomik, Greqia dhe Turqia synojnë të arrijnë një volum tregtar dypalësh prej 10 miliardë dollarësh deri në fund të dekadës. Për këtë qëllim, ato do të intensifikojnë bashkëpunimin mes komuniteteve të biznesit dhe do të mbështesin aktivitetet e Këshillit të Përbashkët të Biznesit greko-turk.
Dy vendet përshëndetën vazhdimin e regjimit të përkohshëm të vizave Shengen për qëndrime të shkurtra, që lehtëson vizitat turistike të shtetasve turq në 12 ishuj grekë të Egjeut.
Në fushën e migracionit, palët vlerësuan rezultatet e mekanizmit trepalësh me Bullgarinë për luftën kundër migracionit të parregullt dhe ranë dakord ta forcojnë më tej bashkëpunimin. Ato theksuan gjithashtu rëndësinë e bashkëpunimit ndërkombëtar kundër terrorizmit dhe krimit të organizuar.
Sa i përket energjisë, Athina dhe Ankaraja do të shqyrtojnë mundësitë për thellimin e bashkëpunimit, veçanërisht në ndërlidhjen e energjisë elektrike dhe burimet e rinovueshme. Në infrastrukturë, ato do të vijojnë projektet për modernizimin e korridoreve rrugore dhe hekurudhore ndërkufitare, përfshirë ndërtimin e një ure të dytë në pikën kufitare Kipi–Ipsala, bazuar në marrëveshjen e vitit 2006.
Të dyja palët u angazhuan për forcimin e bashkëpunimit në shkencë, teknologji dhe inovacion, përfshirë fushën e inteligjencës artificiale, si dhe për menaxhimin e qëndrueshëm të ujërave në pellgun e lumit Meriç/Ervros, me fokus në përballimin e përmbytjeve dhe ndikimeve të ndryshimeve klimatike.
Në aspektin euroatlantik, Greqia dhe Turqia riafirmuan angazhimin për të bashkëpunuar në mënyrë konstruktive brenda NATO-s, përfshirë në prag të samitit që do të mbahet në Ankara më 7-8 korrik 2026. Liderët shkëmbyen gjithashtu pikëpamje mbi marrëdhëniet Turqi–BE dhe mbi zhvillimet rajonale dhe ndërkombëtare.
Takimi konfirmoi vijimin e dialogut politik, të ashtuquajturën “Agjendë Pozitive” dhe diskutimet për Masat e Ndërtimit të Besimit, në përpjekje për të ruajtur stabilitetin në marrëdhëniet dypalëshe mes dy vendeve anëtare të NATO-s.
Lini një Përgjigje