FLASH
Shkruar nga Pamfleti
Bashkimi Evropian nuk arriti të miratonte një paketë të re sanksionesh ndaj Rusisë, duke vënë në pah një tjetër përçarje të brendshme mes shteteve anëtare përballë luftës në Ukrainë. Lajmin e bëri publik vetë Shefja e Politikës së Jashtme të BE-së, Kaja Kallas, pas një takimi të ministrave të jashtëm në Bruksel.
“Jam shumë e trishtuar që nuk arritëm marrëveshje sot. Ishim shumë afër sigurimit të Sllovakisë – Komisioni përmbushi gjithçka që kërkuan”, u shpreh Kallas para gazetarëve, duke bërë të qartë se pengesa e vetme tashmë mbetet Bratislava, e cila nuk ka dhënë ende dritën jeshile për paketën e re ndëshkuese ndaj Kremlinit.
Europa nguron, Rusia bombardon
Deklarata e Kallas vjen në një moment kritik: sipas saj, Rusia ka intensifikuar fushatën e bombardimeve në Ukrainë, me nivele rekord gjatë javëve të fundit, si dhe ka përdorur “në mënyrë të përsëritur armë kimike të ndaluara”, sipas vëzhgimeve të BE-së.
“E vetmja mënyrë për ta detyruar Putinin të përfundojë këtë luftë është ta shtyjmë drejt një zgjidhjeje përmes presionit të bashkuar. Rusia nuk kërkon paqe, dhe kjo është më e qartë se kurrë”, theksoi Kallas.
Në këtë kontekst, paketa e re sanksionesh konsiderohet si një ndër më të fortat e propozuara ndonjëherë nga BE-ja, me masa të ashpra ekonomike, ndalim eksporteve teknologjike dhe goditje financiare në sektorët e energjisë dhe industrisë ruse.
Trump dërgon armë, BE heziton
Në të njëjtën dalje, Kallas përshëndeti vendimin e Presidentit të SHBA-së, Donald Trump, për të dërguar më shumë armë në Ukrainë. “E mirëpresim njoftimin e Presidentit Trump. Por, do të donim që SHBA të ndante barrën, nëse veprojmë bashkë, mund të ushtrojmë presion real mbi Putinin,” tha ajo.
Kjo deklaratë përforcon realitetin e një bashkëpunimi më të ngushtë transatlantik, por gjithashtu nxjerr në pah tensionet e brendshme në BE, ku mungesa e një zëri të unifikuar po pengon vendimmarrjen në çështje të sigurisë dhe politikës së jashtme.
Sllovakia në qendër të vëmendjes: “Topi është në fushën e tyre”
Duke theksuar rolin vendimtar të Sllovakisë, Kallas u shpreh: “Kanë kaluar tashmë dy muaj. Ne duhet ta përfundojmë këtë marrëveshje. Topi është në fushën e Sllovakisë”.
Bratislava, një nga zërat më të zëshëm pro-balancës mes Rusisë dhe Perëndimit, ka ngritur shqetësime mbi efektet ekonomike të sanksioneve në industrinë e saj të brendshme, një linjë që është përplasur me presionin në rritje nga shtete si Polonia, Lituania dhe Gjermania që kërkojnë masa më të forta kundër Kremlinit.
Lini një Përgjigje