FLASH
Shkruar nga Pamfleti
Kriza ndërkombëtare për Groenlandën po hyn në një fazë të re përshkallëzimi. Sipas një raporti të brendshëm të siguruar nga revista gjermane Der Spiegel, Gjermania po shqyrton përdorimin e armës më të fortë tregtare të Bashkimit Evropian, të njohur si “bazuka tregtare”, nëse Shtetet e Bashkuara e çojnë përpara kërcënimin për aneksimin e Groenlandës dhe vendosjen e tarifave ndëshkuese ndaj vendeve të BE-së.
Bëhet fjalë për një dokument zyrtar të Ministrisë së Jashtme gjermane, drejtuar përfaqësuesit të Berlinit në Bruksel, ku përshkruhet qartë qëndrimi që duhet të mbahet në konsultimet me partnerët evropianë:
“Nëse SHBA e konkretizon kërcënimin, duhet të jemi të përgatitur për një përplasje tregtare. Është e nevojshme të qëndrojmë të palëkundur përballë retorikës së Trumpit dhe të shqyrtojmë të gjitha mjetet tona politike.”
Në qendër të këtij arsenali qëndron “Instrumenti kundër shantazhit ekonomik”, një mekanizëm i miratuar nga BE në vitin 2023, që i jep Brukselit fuqinë për të bllokuar kompani të huaja nga tenderët publikë apo për të vendosur tarifa të rënda, nëse një vend i tretë ushtron presion ekonomik ndaj një vendi anëtar.
Ky instrument, i cili përkufizohet si “bazuka tregtare”, po merret seriozisht për herë të parë kundër një aleati të NATO-s, për shkak të kërcënimeve të presidentit amerikan Donald Trump, i cili në fundjavë u dërgoi sinjal të qartë Gjermanisë dhe 7 vendeve të tjera evropiane: ose të mos bllokojnë projektin amerikan për Groenlandën, ose do të përballen me tarifa 10% që hyjnë në fuqi më 1 shkurt dhe rriten në 25% në qershor.
Kancelari gjerman Friedrich Merz, ndonëse ka mbajtur deri tani një ton më të butë sesa homologu francez Emmanuel Macron, nuk e përjashtoi opsionin e përgjigjes së fortë: “Si evropianë, duhet të veprojmë me maturi, por edhe me vendosmëri përballë provokimeve të tilla”, deklaroi ai të hënën, duke lënë derën hapur për përdorimin e instrumentit si mjet presioni.
Në Bruksel, skenari që po përgatitet është fillimisht aktivizimi teknik i instrumentit pa e përdorur menjëherë, si sinjal paralajmërues. Përdorimi real i tij mund të përshpejtojë përplasjen ekonomike SHBA–BE, në një moment ku krizat në Arktik dhe Ukrainë kanë tensionuar në maksimum marrëdhëniet transatlantike.
Lini një Përgjigje