FLASH
Shkruar nga Pamfleti
Raportohet se Ajatollah Ali Khamenei është fshehur në një bunker, nga frika e sulmeve të mundshme ajrore të SHBA-së, ndërsa aeroplanmbajtësja amerikane USS Abraham Lincoln po lëviz drejt Gjirit Persik.
Sipas Iran International, të cituar nga Jerusalem Post, udhëheqësi suprem 86-vjeçar është zhvendosur në një strehë të fortifikuar në Teheran, e lidhur me një rrjet kompleks tunelesh nëntokësore, pas paralajmërimeve të zyrtarëve të lartë ushtarakë për rritjen e rrezikut të një sulmi amerikan të afërt.
Burimet thonë se Khamenei i ka deleguar menaxhimin e çështjeve të përditshme të Republikës Islamike djalit të tij më të vogël, Masoud Khamenei, 53 vjeç, i cili tashmë thuhet se ka marrë rol emergjent si kanali kryesor i komunikimit me ekzekutivin e regjimit.
Teherani vlerëson si të lartë mundësinë e sulmeve ajrore, pas deklaratës së presidentit amerikan Donald Trump të premten, se anijet amerikane po shkojnë drejt Lindjes së Mesme si një paralajmërim i drejtpërdrejtë për Ajatollahun, në vazhdën e një përplasjeje publike deklaratash mes dy liderëve ditët e fundit.
Trump është shprehur publikisht se Marina Amerikane po dërgon një “armadë” të madhe. Grupi sulmues i aeroplanmbajtëses Abraham Lincoln, i shoqëruar nga tre anije shkatërruese, ndodhet aktualisht në lëvizje nga Oqeani Indian drejt Gjirit Persik, sipas raportimit të Stars and Stripes.
Publikisht, Irani nuk ka treguar shenja tërheqjeje nga përshkallëzimi. Presidenti iranian Masoud Pezeshkian ka deklaruar se çdo sulm ndaj Khameneit nga SHBA ose Izraeli do të konsiderohet “luftë totale kundër nesh”.
Edhe komisioni parlamentar iranian për sigurinë kombëtare ka paralajmëruar këtë javë se një goditje ndaj Khameneit mund të nxisë shpalljen e “Xhihadit”, sipas Iranian Press News dhe Jerusalem Post.
Ndërkohë, Khamenei, i cili ka qenë aktiv në rrjetet sociale, nuk ka postuar në platformën X që prej 17 janarit, ndërsa nuk dihet saktësisht se kur është strehuar.
Kjo nuk është hera e parë që udhëheqësi suprem tërhiqet në strehim nëntokësor. Sipas raportimeve, gjatë muajit qershor, në kohën e konfliktit 12-ditor me Izraelin, ai ishte izoluar në bunker dhe kishte hartuar edhe një listë të mundshme pasardhësish në rast se do të vritej.
Postimi i tij i fundit këtë vit në X përmbante kërcënime për ndjekje të “kriminelëve” si brenda ashtu edhe jashtë vendit, të cilët regjimi i konsideron përgjegjës për protestat masive që kanë shpërthyer në Iran që prej 28 dhjetorit.
Protestat, të nxitura nga kriza ekonomike e rënduar pas thatësirës më të madhe të dekadave të fundit, kanë sjellë reagim brutal nga forcat e regjimit. Raportimet pretendojnë se janë qëlluar të paktën 3 mijë qytetarë, ndërsa disa burime të tjera flasin për një shifër shumë më të lartë viktimash, deri në 20 mijë të vdekur, shifra që mbeten të pakonfirmuara në mënyrë të pavarur.
Lini një Përgjigje