FLASH
Shkruar nga Pamfleti
Ish-presidenti amerikan Barack Obama komentoi zhvillimet e fundit në skenën politike amerikane gjatë një interviste të publikuar të shtunën, duke reaguar në mënyrë të tërthortë ndaj një videoje me përmbajtje raciste të shpërndarë në rrjetet sociale nga presidenti Donald Trump.
Në podkastin 47-minutësh, prezantuesi Brian Tyler Cohen e pyeti Obamën për nivelin e debatit publik në Shtetet e Bashkuara, të cilin e cilësoi të përkeqësuar. Ai përmendi edhe pretendimet e Shtëpisë së Bardhë se emigrantët e ndaluar nga agjentët e Zbatimit të Ligjit për Imigracionin dhe Doganat konsiderohen terroristë vendas, si dhe faktin që Trump kishte publikuar një imazh ku Obama paraqitej në trupin e një majmuni.
Obama nuk e përmendi me emër Trumpin në përgjigjet e tij, por theksoi se pjesa më e madhe e qytetarëve amerikanë e shohin një sjellje të tillë si shqetësuese.
Ai pranoi se përmbajtje të tilla tërheqin vëmendje dhe krijojnë shpërqendrim, por shtoi se diskursi publik ka humbur standardet e mëparshme të etikës dhe korrektesës në ushtrimin e funksioneve publike.
“Dhe ajo që është e vërtetë është se nuk duket se ka ndonjë turp për këtë midis njerëzve që dikur mendonin se duhej të kishe një lloj etikete dhe një ndjenjë korrektese dhe respekti për detyrën, apo jo? Kjo është humbur”, tha ai por pa përmendur emrin e Trump në përgjigjen e tij.
Ai foli edhe për rolin e mediave sociale dhe televizionit, duke i përshkruar si hapësira ku dominon një qasje spektakolare që, sipas tij, ka zëvendësuar ndjenjën e përgjegjësisë institucionale.
Gjatë intervistës, Obama trajtoi edhe tema të tjera, përfshirë protestat paqësore kundër operacioneve të imigracionit, procesin e rindarjes së zonave zgjedhore dhe projektin e bibliotekës së tij presidenciale, e cila parashikohet të hapet në Çikago vitin e ardhshëm.
Lini një Përgjigje