FLASH
Shkruar nga Pamfleti
Përfaqësuesja e lartë e Bashkimit Evropian për politikën e jashtme dhe sigurinë, Kaja Kallas, deklaroi se NATO nuk mund të ndërhyjë për hapjen e Ngushticës së Hormuzit, pasi kjo zonë ndodhet jashtë juridiksionit të Aleancës.
Duke folur për situatën e krijuar në këtë korridor strategjik detar, Kallas theksoi se çështja është diskutuar edhe më parë me NATO-n, por sipas saj ndërhyrja e drejtpërdrejtë e Aleancës nuk është e mundur për shkak të kufizimeve të mandatit.
“Ne kemi qenë në kontakt me NATO-n më parë, por kjo është vërtet jashtë zonës së ndërhyrjes së NATO-s. Kjo është arsyeja pse kemi Operacionin Aspides, dhe ka shtete anëtare të gatshme të kontribuojnë, si në ‘koalicionin e të gatshëmve’ ashtu edhe në vetë operacionin”, u shpreh ajo.
Kallas shtoi se Ngushtica e Hormuzit nuk është territor ku operojnë vendet e NATO-s, duke theksuar se për këtë arsye diskutimet aktuale fokusohen te roli që mund të marrin shtetet anëtare të BE-së.
Sipas saj, fillimisht duhet të qartësohet se çfarë janë të gatshme të bëjnë shtetet anëtare për të garantuar sigurinë e lundrimit në këtë zonë strategjike.
“Ekziston gjithashtu diskutimi se mund të ketë ndërhyrje pasi të mbarojnë luftimet kryesore. Por sigurisht, ekziston nevoja për të rihapur Ngushticën e Hormuzit tani. Kështu që do ta diskutojmë këtë sot”, tha Kallas.
Ngushtica e Hormuzit konsiderohet një nga rrugët më të rëndësishme detare për transportin global të energjisë, dhe çdo bllokim i saj mund të ketë ndikim të madh në tregjet ndërkombëtare.
Lini një Përgjigje