FLASH
Shkruar nga Pamfleti
Situata humanitare në Liban po përkeqësohet me shpejtësi, ndërsa numri i personave të detyruar të largohen nga shtëpitë e tyre vazhdon të rritet për shkak të përshkallëzimit të luftimeve dhe urdhrave të evakuimit të lëshuara nga Izraeli.
Sipas Organizatës Ndërkombëtare për Migracionin (IOM), afro 1 milion persona janë zhvendosur brenda vendit, duke krijuar një nga krizat më të mëdha humanitare në Liban në vitet e fundit.
Drejtoresha e përgjithshme e IOM, Amy Pope, deklaroi se është “thellësisht e alarmuar” nga raportimet për një sulm që goditi persona të zhvendosur që po strehoheshin në Bejrut, ku të paktën tetë persona u vranë dhe dhjetëra të tjerë u plagosën.
Sipas agjencisë së OKB-së për migracionin, shumë familje janë detyruar të braktisin shtëpitë e tyre për shkak të intensifikimit të luftimeve dhe urdhrave për evakuim në disa zona të vendit.
Rreth 125 mijë persona janë strehuar në qendra kolektive të menaxhuara nga autoritetet libaneze, ndërsa shumë të tjerë po gjejnë strehë te të afërm, miq apo komunitete lokale. Megjithatë, mijëra njerëz mbeten pa kushte të përshtatshme strehimi, ndërsa disa familje janë detyruar të flenë edhe në rrugë.
Shumë nga të zhvendosurit kanë mbërritur në kryeqytet vetëm me rrobat që kishin veshur dhe tani jetojnë në tenda ose strehimore të improvizuara, që ofrojnë shumë pak mbrojtje nga bombardimet.
Amy Pope paralajmëroi se situata kërkon ndihmë urgjente ndërkombëtare për të shmangur përkeqësimin e krizës humanitare.
“E Drejta Ndërkombëtare Humanitare kërkon që palët në konflikt të lejojnë dhe të lehtësojnë ndihmën humanitare të shpejtë për civilët në nevojë. Kjo duhet të respektohet tani”, u shpreh ajo.
Lini një Përgjigje