FLASH
Shkruar nga Pamfleti
Është konfirmuar vizita zyrtare e presidentit të përkohshëm sirian, Ahmed al-Sharaa, në Uashington D.C. javën e ardhshme. Al-Sharaa, ish-udhëheqës i njohur i grupeve rebele, do të takohet me presidentin amerikan Donald Trump më 10 nëntor.
Kjo do të jetë vizita e parë e një udhëheqësi sirian në SHBA pas rrëzimit të regjimit të Bashar al-Assad-it. Një zyrtar i lartë i Shtëpisë së Bardhë konfirmoi lajmin për Fox News Digital, duke theksuar se kjo vizitë është pjesë e përpjekjeve të administratës Trump për të rivendosur stabilitetin në rajon.
"Ky takim do të diskutojë hapat e ardhshëm për një Siri të qëndrueshme dhe bashkëpunimin e mundshëm ekonomik", tha zyrtari, duke mos dhënë detaje të mëtejshme për axhendën.
Trump dhe al-Sharaa u takuan për herë të parë në maj të këtij viti, gjatë vizitës së presidentit amerikan në Arabinë Saudite. Trump foli me ton entuziast për bisedën e tyre, duke e përshkruar al-Sharaa-n si "një djalë të ri, tërheqës dhe tip të fortë".
Duke folur me gazetarët në bordin e Air Force One, Trump shtoi: "Ka një të kaluar të fortë, luftëtar i vërtetë. Ka një shans real për ta mbajtur vendin të qëndrueshëm."
Këto fjalë erdhën pavarësisht historisë së al-Sharaa-s, i cili më parë njihej me emrin e luftës Abu Mohammad al-Jolani dhe ka qenë udhëheqës i Al-Kaedës në Siri.
Lini një Përgjigje