FLASH
Shkruar nga Pamfleti
Presidenti i SHBA-së, Donald Trump, ka deklaruar se forcat amerikane kanë “shkatërruar plotësisht” çdo objektiv ushtarak në ishullin Kharg të Iranit. Trump paralajmëroi se mund të goditet edhe infrastruktura e naftës nëse Teherani ndërhyn në lirinë e lundrimit në Ngushticën e Hormuzit.
Në një deklaratë të tij, Trump tha se deri më tani ka vendosur të mos godasë objektet energjitike në ishull, por theksoi se ky vendim mund të ndryshojë nëse Irani ose aktorë të tjerë pengojnë kalimin e sigurt të anijeve në këtë korridor strategjik detar.
“Kam zgjedhur të mos shkatërroj infrastrukturën e naftës në ishullin Kharg. Nëse Irani ose të tjerë ndërhyjnë në kalimin e lirë dhe të sigurt të anijeve përmes Ngushticës së Hormuzit, do ta rishqyrtoj menjëherë këtë vendim”, u shpreh ai.
Nga ana tjetër, autoritetet iraniane paralajmëruan se çdo sulm ndaj objekteve të tyre energjitike do të sjellë kundërpërgjigje të ashpër. Teherani deklaroi se infrastruktura e naftës dhe energjisë që i përket kompanive që bashkëpunojnë me Shtetet e Bashkuara mund të “kthehet në një grumbull hiri” nëse objektet energjitike iraniane sulmohen.
Ishulli Kharg konsiderohet një pikë kyçe për ekonominë iraniane, pasi rreth 90% e eksporteve të naftës së vendit kalojnë përmes këtij terminali strategjik.
Ndërkohë, situata e sigurisë në rajon mbetet e tensionuar. Sipas zyrtarëve irakianë, ambasada e Shteteve të Bashkuara në Bagdad është goditur nga një raketë. Ky është sulmi i dytë ndaj ambasadës amerikane që nga fillimi i konfliktit mes SHBA-së dhe Izraelit kundër Iranit.
Përgjegjësinë për sulmet e përditshme me raketa dhe dronë ndaj bazave amerikane në rajon e kanë marrë disa grupe të armatosura të mbështetura nga Teherani, të bashkuara nën ombrellën e lëvizjes “Rezistenca Islamike në Irak”. Sulmet vijnë pas vrasjes së dy anëtarëve të grupit Kataeb Hezbollah, njëri prej të cilëve raportohet të ketë qenë figurë e rëndësishme në rrjetin e lidhur me Iranin.
Në të njëjtën kohë, Shtetet e Bashkuara pritet të dërgojnë një njësi marinsash dhe anije të tjera luftarake në Lindjen e Mesme, në kuadër të përforcimit të pranisë ushtarake në rajon.
Shpërthime të forta janë raportuar gjithashtu në Doha. Ministria e Brendshme e Katarit njoftoi se autoritetet kanë arritur të parandalojnë një sulm raketor iranian.
Lini një Përgjigje