FLASH
Shkruar nga Pamfleti
Jan Marsalek, ish-drejtor i kompanisë gjermane të pagesave, thuhet se është i lidhur me një skemë që përfshin edhe oligarkë rusë të sanksionuar...
Jan Marsalek, ish-drejtori i Wirecard, i cili iku në Moskë pas falimentimit të kompanisë gjermane në vitin 2020, kur doli në pah një mashtrim prej 1.9 miliardë eurosh, është i lidhur, përmes rrjetit bullgar të spiunazhit që ai drejtonte në Mbretërinë e Bashkuar, me një skemë të sanksionuar pastrimi parash që përfshinte tregtarë droge dhe oligarkë rusë.
Financial Times raporton se, sipas NCA-së britanike, spiunët morën fonde nga dy rrjete kriminale të njohura si Smart dhe TGR.
Rrjetet mbledhin para nga trafiku i drogës, trafiku i armëve dhe imigracioni i paligjshëm, i transformojnë ato në kriptomonedha dhe ua dërgojnë kriminelëve ose individëve nën sanksione.
Në verën e vitit 2023, pasi policia arrestoi shumicën e anëtarëve të rrjetit, individë të afërt me inteligjencën ruse u përpoqën të përdornin Smart për të financuar spiunë bullgarë, ndërsa Marsalek ishte në Moskë.
Sipas NCA-së, skema u përdor nga oligarkët dhe karteli Kinahan, rrjeti irlandez i trafikimit të kokainës i lidhur me vrasje të shumta me kontratë, shkruan monetaweb.
Smart drejtohet nga Ekaterina Zhdanova, një shtetase ruse nën sanksionet e SHBA-së dhe aktualisht në paraburgim në Francë, ndërsa TGR drejtohet nga George Rossi, një shtetas ukrainas i lindur në Rusi, gjithashtu nën sanksionet e SHBA-së.
Hetimi i NCA-së, i quajtur Operacioni Destabilizo, rezultoi në 128 arrestime dhe sekuestrimin e mbi 25 milionë paundëve në para të gatshme dhe kriptomonedha.
Hetuesit theksuan se si shteti rus u përpoq të bashkëpunonte me bandat kriminale për të anashkaluar sanksionet perëndimore të vendosura pas pushtimit të Ukrainës në vitin 2022.
Për të dekurajuar këdo që të bashkëpunonte me këto rrjete, NCA vendosi postera në rusisht dhe anglisht në banjot e zonave të shërbimit të autostradave britanike.
Lini një Përgjigje