FLASH
Shkruar nga Pamfleti
Një deklaratë raciste e publikuar në rrjetin social X nga kongresmeni republikan Randy Fine ka shkaktuar reagime të ashpra politike në Shtetet e Bashkuara. Fine shkroi: “Nëse na detyrojnë të zgjedhim, zgjedhja midis qenve dhe myslimanëve nuk është e vështirë”, në përgjigje të komenteve të një drejtuesi të një grupi pro-palestinez lidhur me pronarët e qenve që nuk pastrojnë mbetjet e kafshëve në rrugët e Neë York City.
Deklarata e tij nxiti menjëherë kritika nga ligjvënësit demokratë, të cilët kërkuan dorëheqjen e kongresmenit ose përballjen e tij me masa disiplinore. Fine i mbrojti komentet gjatë një interviste televizive, duke argumentuar se ato janë keqinterpretuar dhe duke mos u tërhequr nga qëndrimi i tij.
Udhëheqësi i pakicës demokrate në Dhomën e Përfaqësuesve, Hakeem Jeffries, e cilësoi Fine si “islamofob dhe fanatik të papenduar”. Ai kritikoi kryetarin republikan të Dhomës, Mike Johnson, për mungesë reagimi publik ndaj deklaratës. Jeffries paralajmëroi se demokratët do të shqyrtojnë masa disiplinore, veçanërisht nëse rifitojnë kontrollin e Dhomës pas zgjedhjeve të mesit të mandatit në nëntor.
Reagime erdhën edhe nga krahu progresist i Partisë Demokratike. Kongresmenja Alexandria Ocasio-Cortez e cilësoi deklaratën si “një nga më të papranueshmet që ka parë ndonjëherë nga një zyrtar amerikan” dhe kërkoi censurimin e Fine si dhe largimin e tij nga komisionet parlamentare. Sipas saj, mosreagimi institucional do të kontribuonte në normalizimin e një retorike të tillë.
Deklarata ka thelluar përplasjet mes republikanëve dhe demokratëve në Kongres, duke e kthyer çështjen në një debat të ri politik në SHBA.
Lini një Përgjigje