FLASH
Shkruar nga Pamfleti
Uashingtoni sulmoi objektiva ushtarake iraniane për të tetën natë radhazi, pasi dy ushtarë amerikanë u vranë në Jordani. Irani reagoi me sulme me dronë ndaj bazave amerikane në Kuvajt, ndërsa përshkallëzimi mes dy vendeve vazhdon.
Shtetet e Bashkuara ndërmorën të shtunën mbrëma një tjetër valë sulmesh ajrore ndaj Iranit, duke goditur objektiva të mbrojtjes ajrore dhe sisteme të vëzhgimit bregdetar, në atë që Komanda Qendrore Amerikane (CENTCOM) e cilësoi si përpjekje për të dobësuar aftësitë ushtarake të Teheranit dhe për të mbrojtur lundrimin tregtar në Ngushticën e Hormuzit.
Sipas CENTCOM-it, sulmet kishin në shënjestër edhe njësitë e Gardës Revolucionare Islamike (IRGC), të cilat Uashingtoni i akuzon për sulmin me raketa balistike dhe dronë ndaj forcave amerikane në Jordani të premten, ku mbetën të vrarë dy ushtarë amerikanë, ndërsa një tjetër rezulton ende i zhdukur.
"Dy ushtarë amerikanë u vranë gjatë mbrojtjes ndaj sulmeve iraniane me raketa balistike dhe dronë. Një tjetër ushtarak vazhdon të jetë i zhdukur", thuhet në deklaratën e CENTCOM-it, i cili bëri të ditur se identitetet e viktimave nuk do të publikohen derisa të njoftohen familjarët.
Nga ana tjetër, mediat shtetërore iraniane raportuan se ishulli Qeshm, në Ngushticën e Hormuzit, ishte një nga objektivat e bombardimeve amerikane.
Pak orë pas sulmeve, ushtria iraniane njoftoi se kishte ndërmarrë sulme me dronë ndaj dy bazave ushtarake amerikane në Kuvajt. Sipas agjencisë iraniane Tasnim, e afërt me Gardën Revolucionare, objektivat ishin depoja ushtarake amerikane në Camp Udairi dhe baza ajrore Ali Al Salem.
CENTCOM bëri të ditur se sulmet amerikane ishin të tetat radhazi kundër objektivave iraniane dhe synonin "të dëmtonin më tej aftësinë e Iranit për të kërcënuar transportin detar në Ngushticën e Hormuzit", si dhe të "ndëshkonin shpejt forcat e Gardës Revolucionare që sulmuan ushtarët amerikanë në Jordani".
Përshkallëzimi i fundit vjen pas dështimit të armëpushimit paraprak mes Uashingtonit dhe Teheranit. Marrëveshja, e arritur në qershor për t'i dhënë fund konfliktit, u rrëzua vetëm pak javë më vonë, pasi presidenti amerikan Donald Trump deklaroi më 8 korrik se ajo ishte "marrë fund".
Ndërkohë, SHBA ka rikthyer bllokadën ndaj porteve iraniane, ndërsa Irani ka shpallur mbylljen e Ngushticës së Hormuzit, duke rritur ndjeshëm tensionet në rajon dhe shqetësimet për sigurinë e një prej korridoreve më të rëndësishme të tregtisë globale të naftës.
Sekretari amerikan i Mbrojtjes, Pete Hegseth, reagoi pas vrasjes së dy ushtarëve amerikanë me një mesazh në rrjetin X: "Lavdi heronjve. Sakrifica e tyre vetëm sa e forcon vendosmërinë tonë."
Me vdekjen e dy ushtarëve në Jordani, numri i viktimave amerikane në konflikt ka arritur në 16, pasi më herët gjatë javës u konfirmua edhe vdekja e një piloti të Marinës amerikane që rezultonte i zhdukur.
Lini një Përgjigje