FLASH
Shkruar nga Pamfleti
Lorent Tolaj duket se është gati për një sfidë të re në karrierën e tij. Në Angli raportojnë se transferimi i sulmuesit shqiptar te Bristol Siti është shumë pranë realizimit, me klubin e Championship që pritet të paguajë rreth 4 milionë paund për kartonin e tij te Plimuth.
Tolaj po ndjek kështu gjurmët e Anis Mehmetit, i cili gjithashtu bëri hapin drejt niveleve më të larta të futbollit anglez. Sulmuesi 23-vjeçar ka spikatur në sezonet e fundit me paraqitjet dhe golat e tij në League Two dhe League One, duke tërhequr vëmendjen e disa klubeve.
Bomberi me origjinë shqiptare ka realizuar plot 58 gola në tre sezonet e fundit, ndërsa ka dhënë edhe 30 asiste. Me një kontribut total prej 88 golash, Tolaj është kthyer në një nga sulmuesit më produktivë të kampionateve të ulëta angleze.
Sezonin e fundit ai e mbylli me Plimuthin në League One, kategoria e tretë e futbollit anglez për nga rëndësia, ku vazhdoi të tregojë vlerat e tij si një sulmues me nuhatje për golin.
Deri tani, Tolaj ka përfaqësuar vetëm ekipet e moshave të Zvicrës, por Federata Shqiptare e Futbollit po monitoron situatën e tij. Nëse FSHF arrin ta bindë për të veshur fanellën kuqezi, Shqipëria mund të fitojë një sulmues me potencial të madh për të ardhmen.
Vetë Tolaj ka treguar më herët lidhjen e tij me origjinën shqiptare, duke festuar disa gola me simbolin e shqiponjës, një shenjë e qartë e afërsisë së tij me ngjyrat kuqezi.
Lini një Përgjigje