FLASH
Shkruar nga Pamfleti
Aaleanca e Netanyahut, ku do të marrin pjesë Greqia dhe Qiproja, do të përballet me boshtin sunit në rajon, ku përfshihet edhe Turqia…
Mediat turke shfaqen veçanërisht të irrituara nga deklarata e kryeministrit izraelit, Benjamin Netanyahu, se synon të krijojë një “gjashtëkëndësh aleancash” në Mesdhe, me pjesëmarrjen e Indisë, shteteve arabe, vendeve afrikane, partnerëve mesdhetarë si Greqia dhe Qiproja, si dhe vendeve të tjera aziatike.
Qëllimi, sipas tij, është formimi i një boshti shtetesh me pikëpamje të përbashkëta për sfidat rajonale, duke iu kundërvënë asaj që ai e përshkroi si blloqe radikale shiite dhe sunite në Lindjen e Mesme.
“Netanyahu shpalli planin e ri të aleancave të Izraelit. Synimi i tij është të ndryshojë ekuilibrin e forcave në Lindjen e Mesme dhe në Mesdhe”. Ky është titulli i gazetës turke Hurriyet, e cila thekson se kjo aleancë do të përballet me boshtin e forcave sunite, si Turqia, por edhe me forcat shiite në rajon.
Faqja e internetit Haberler thekson se Netanyahu bëri publike listën e vendeve të aleancës që dëshiron të krijojë në rajon. Ajo publikon një reportazh të zgjeruar mbi deklaratat e kryeministrit izraelit dhe mbi synimet e tij për krijimin e një gjashtëkëndëshi aleancash.
Gazeta turke Milliyet vëren se Izraeli “shtypi butonin për një gjashtëkëndësh aleancash! U publikua lista e vendeve të boshtit të ri kundër armiqve”. Sipas saj, ky bosht do të jetë përballë boshtit shiit dhe atij sunit në Lindjen e Mesme dhe në Mesdhe.
Faqja turke Timeturk në reportazhin e saj komenton se “Netanyahu po luan me zjarrin: ‘Do të krijojmë një sistem aleancash me Greqinë dhe Qipron jugore’”.
Gazeta Aydinlik, në artikullin e saj për deklaratat e Netanyahut, thekson se kryeministri izraelit synon një aleancë kundër Iranit dhe Turqisë, në të cilën përfshihen “Qiproja jugore, India dhe Greqia”.
“Kryeministri i Izraelit, Benjamin Netanyahu, shpalli objektivin e tij për të krijuar një bosht të ri aleancash me në qendër Mesdheun dhe Azinë Perëndimore. Plani, në të cilin mund të marrin pjesë India, disa vende arabe dhe afrikane, si dhe Greqia dhe Qiproja jugore, ka rihapur diskutimet mbi dinamikën e pushtetit në rajon”, shkruan gazeta.
Lini një Përgjigje