FLASH
Shkruar nga Pamfleti
Një zjarr i fuqishëm ka përfshirë garazhin e një pallati në zonën e Spitallës në Durrës, natën e së mërkurës, duke shkaktuar momente paniku për banorët e zonës. Ngjarja ndodhi në afërsi të ish-zdrukthëtarisë, një zonë me ndërtime të dendura dhe banim të lartë.
Flakët u përhapën me shpejtësi, duke krijuar rrezik për objektet dhe automjetet që ndodheshin në ambientet e poshtme të pallatit. Fatmirësisht, ndërhyrja në kohë e forcave zjarrfikëse bëri të mundur neutralizimin e zjarrit dhe parandalimin e përhapjes së tij në katet e sipërme.
Deri më tani nuk raportohet për të lënduar, ndërsa po verifikohet shkaku i shpërthimit të zjarrit. Paraprakisht dyshohet për një defekt elektrik në një nga njësitë e garazhit, por hetimet janë në vijim.
Pamjet nga vendngjarja tregojnë përmasat e zjarrit dhe dëmet materiale që la pas. Autoritetet u bëjnë thirrje banorëve të jenë të kujdesshëm dhe të raportojnë çdo rrezik potencial në zonat e banuara.
Lini një Përgjigje