FLASH
Shkruar nga Pamfleti
Deputeti britanik Nigel Farage ka replikuar sërish me kryeministrin Rama. Pasi pranoi sfidën e lidhur me emigrantët e dënuar në Mbretërinë e Bashkuar, sot pretendon se e ka fituar ‘bastin’.
Në një reagim të bërë së fundmi në rrjetin “X”, Farage shkruan se 1 në 48 shqiptarë që jetojnë në Mbretërinë e Bashkuar, është i burgosur. Madje, ai shprehet se do angazhohet për t’i dëbuar drejt Shqipërisë.
“I nderuar Edi Rama. Në Mbretërinë e Bashkuar ka 53,000 shqiptarë dhe 1,099 prej tyre janë në burgjet tona. Në fakt, kjo është 1 në 48. Do t’i kërkoj Sekretarit të Brendshëm të organizojë që të gjithë këta të burgosur t’ju kthehen. Faleminderit për bashkëpunimin tuaj”, thuhet në reagimin e tij, në përgjigje të kryeministrit Rama.
Rama reagoi më herët duke thënë se pretendimi i Farage se “një në 50 shqiptarë në Britani janë në burg” është jo fakt, por absurd dhe se e cilësoi si një taktikë tipike nga manuali i pas-Brexit-it.
Kryeministri Rama i bëri Farage-it një sfidë publike: “Tani, meqë të dy duket se e çmojmë ‘vullnetin e mirë’ dhe jemi qartazi alergjikë ndaj ‘hipokrizisë’, kam një ofertë: Të sjellim të dy shifrat tona në tryezë. Nëse pretendimi yt “një në 50” qëndron — unë personalisht angazhohem t’i marr të gjithë mbrapsht. Kjo nuk është një titull konkurrues, është një premtim publik. Por nëse ajo statistikë e frikshme del të jetë thjesht karburant tabloidesh, nuk të kërkoj ndjesë. Asnjë dramë. Në vend të kësaj, do të vish në Shqipëri — si i ftuari im i nderit”.
Lini një Përgjigje